Hormatly Prezidentimiziň parasatly baştutanlygynda Berkarar döwletimiziň bagtyýarlyk döwründe raýatlarymyzyň saglygy ugrunda uly aladalar edilýär. Sagdyn durmuş ýörelgeleri giňden wagyz edilýär. Şundan ruhlanyp, «Tejenkarbamid» zawodynyň mejlisler zalynda «Sagdyn ýaşlar geljegimizdir» ady bilen wagyz-nesihat duşuşygy geçirildi. Tejen şäher Ýaşlar guramasy tarapyndan guralan duşuşyga zawodda zähmet çekýän ýaş hünärmenler gatnaşyp, milletimiziň ruhy-ahlak ýörelgeleri, sagdyn durmuş kadalary dogrusynda giňişleýin gürrüň edildi.
Kakamyrat NURBERDIÝEW,
TMÝG-niň Tejen şäher Geňeşiniň esasy hünärmeni.
Gökderedäki «Altyn damja» çagalar we dynç alyş merkezinde wagtlaryny şadyýan geçirýän çagalaryň arasynda sport ýaryşy geçirildi. Berkararlyk etrap Ýaşlar guramasynyň etrap bilim bölümi bilen bilelikde guran ýaryşy «Kämil nesil — nurana geljek» diýlip atlandyryldy. Çagalar sportuň dürli görnüşleri boýunça öz erjelliklerini görkezdiler. Çekeleşikli we gyzykly geçen bäsleşigiň netijeleri boýunça ýeňiji çagalara dabaraly ýagdaýda sowgatlar gowşuryldy.
Şemşat SULIÝEWA,
TMÝG-niň Berkararlyk etrap Geňeşiniň esasy hünärmeni.
Ýurdumyzyň ähli künjeklerinde çagalaryň tomusky dynç alyş möwsümi gyzgalaňly dowam edýär. Darganata etrabyndaky 1-nji orta mekdebiň «Arzuw» atly dynç alyş meýdançasynda geçirilen sport bäsleşigi hem täsirliligi bilen tapawutlandy. Etrap Ýaşlar guramasy we etrap bilim bölümi tarapyndan guralan bäsleşikde dynç alýan çagalar «Güneş» hem «Nesil» toparlaryna bölünip, şaşka, küşt, düzzüm boýunça özara bäsleşdiler. Ýeňijiler Hormat hatlary we sowgatlar bilen sylaglanyldy.
Leýla GYLYÇMUHAMMEDOWA,
TMÝG-niň Darganata etrap Geňeşiniň esasy hünärmeni.
Murgap etrabyndaky 36-njy orta mekdebiň «Bürgütjik» atly dynç alyş meýdançasyna gatnaýan çagalaryň arasynda «Sagdyn bolalyň!» ady bilen bäsleşik geçirildi. «Aýterek-Günterek», «Çilik», «Topargaçdy» ýaly milli oýunlarymyz boýunça özara bäsleşen körpeleriň bu bäsleşigi etrap Ýaşlar guramasy we etrap bilim bölümi tarapyndan guraldy. Turuwbaşdan şatlyk-şowhuna beslenen bäsleşigiň netijeleri boýunça ýeňiji bolan toparlara Hormat hatlary we sowgatlar dabaraly ýagdaýda gowşuryldy.
Çynar GURBANMYRADOWA,
TMÝG-niň Murgap etrap Geňeşiniň bölüm müdiri.
«Taryha ser salalyň!» ady bilen Serdar etrabynda ýerleşýän «Dürdäne» çagalar sagaldyş we dynç alyş merkezinde dynç alýan çagalaryň gatnaşmagynda etrap Taryhy we ülkäni öwreniş muzeýine gezelenç çäresi guraldy. Etrap Ýaşlar guramasy tarapyndan guralan gezelençde çagalara muzeý işgärleri taryhy-medeni ýadygärliklerimiz, milli gymmatlyklarymyz, egin-eşiklerimiz dogrusynda giňişleýin gürrüň berdiler. Şeýle hem milli däp-dessurlarymyz barada sowal-jogap alşyldy.
Nury NURYÝEW,
TMÝG-niň Serdar etrap Geňeşiniň başlygy.
Geljegimiz bolan ýaş nesilleriň bagtyýarlygy olaryň sagdyn, berk bedenli, kämil bolup ýetişmekleri üçin örän möhümdir. Şundan ugur alyp, Gökdepe etrap Ýaşlar guramasynyň agzybir işgärleri bolup, biz häzirki tomus möwsüminde etrabymyzyň çägindäki mekdepleriň dynç alyş meýdançalarynda yzygiderli bäsleşikleri, duşuşyklary guraýarys. Geçirilýän dürli sport bäsleşikleri, medeniýet we sungat işgärleri bilen duşuşyklar körpeleriň kalbynda şatlyk, buýsanç duýgularyny döredýär. Çünki bagtyýar çagalyk geljekki uly maksatlaryň gözbaşydyr.
Orazberdi HOMMADOW,
TMÝG-niň Gökdepe etrap Geňeşiniň başlygy.
Mary etrabyndaky 38-nji orta mekdebiň «Bagtyýar nesiller» atly dynç alyş meýdançasyna gatnaýan çagalaryň arasynda bäsleşik geçirildi. Etrap Ýaşlar guramasynyň etrap bilim bölümi bilen bilelikde guran bäsleşiginde körpeler ylgamak, uzak aralyga bökmek, şeýle hem zähmet otagynda dürli görnüşli milli zähmet gurallaryny ýasamak boýunça bäsleşdiler. Çekeleşikli geçen ýaryşda ýeňijiler Hormat hatlary we sowgatlar bilen sylaglanyldy.
Zylyha BAKYÝEWA,
TMÝG-niň Mary etrap Geňeşiniň esasy hünärmeni.
Çagalaryň tomusky dynç alyş möwsümleriniň ýatda galyjy bolmagy üçin dürli çäreler guralýar. Şundan ugur alnyp, Saparmyrat Türkmenbaşy etrabyndaky 3-nji orta mekdebiň «Bagtyýar nesil» atly dynç alyş meýdançasynda sportuň şaşka, tanap çekmek, futbol görnüşleri boýunça ýaryş geçirildi. Etrap Ýaşlar guramasynyň etrap bilim bölümi bilen bilelikde guran ýaryşynda ökdeler öňe saýlandy. Şeýle hem ýörite hünärmenleriň gatnaşmagynda çagalara ilkinji lukmançylyk kömeginiň berlişi giňişleýin düşündirildi.
Tahyr TIRKEŞOW,
TMÝG-niň Saparmyrat Türkmenbaşy etrap Geňeşiniň esasy hünärmeni.
“Nesil” gazeti,
04.07.2020ý.
