Hormatly Prezidentimiziň taýýarlamagynda çapdan çykan “Bereketli türkmen saçagy” kitaplarynyň I-II tomlarynda getirilen köp sanly deliller, maglumatlar we tagam taýýarlamagyň dürli-dürli usullary türkmen halkynyň myhmansöýer saçagy hem-de onuň özboluşly milli tagamlary barada doly düşünje berýär. Türkmeniň toýdur baýramlarda, saz-söhbetli duşuşyklarynda taýýarlaýan milli tagamlarynyň biri-de tokly tamdyrlamasydyr. Şeýle bolansoň bu gezek “Bereketli türkmen saçagy” kitabynyň II tomundan tokly tamdyrlamasynyň taýýarlanyşy barada maglumat bermek isledik.
Gerekli önümler:
1 toklynyň eti
300 gram sogan
100 gram sarymsak
300 gram kartoşka
3-4 sany lawr ýapragy
300 gram pomidor
200 gram käşir
Islegiňe görä duz, burç gerek bolýar.
Taýýarlanyşy:
Tamdyrlamada tutuş bir toklynyň eti bişirilýär. Ilki maly soýmaly, etini bölmän taýýarlamaly. Soňra beýleki bir gapda sogan, sarymsak, burç, lawr ýapragy garyşdyrylyp, dürüşde taýýarlamaly we mal etini kesişdirip ýa-da dilişdirip, şol dilnen ýerlerine taýýarlanan dürüşdäni dykyşdyrmaly. Mal etiniň ähli ýerini şeýle etmeli. Soňra tamdyry kemsiz gyzdyryp, çeni bolansoň tamdyryň içindäki gory üýşürmeli. Bir kersene suw guýup, goruň üstüne oturtmaly, soňra şol suwly kersene sogany, kartoşkany, gök otlary, sarymsak dograp atmaly, duz sepmeli. Etleri tutuşlygyna ýarym metr çemesi uzynrak demirden ötürip, tamdyryň içine sallamaly, arça pürlerini suwa ezip sepmeli, dessine tamdyryň agzyny gazan bilen ýapmaly we hiç ýerinden bug çykmaz ýaly gyralaryny palçyk bilen suwamaly. Tamdyryň körügini hem suwamaly. Şunda etiň ýagy mazaly bugaryp, ondan soň bug göterilip eti bişirýär. Kersendäki suw gaýnap, çorba öwrülýär we ondaky zatlaryň hemmesi bişýär. Gowy gyzan tamdyrda eti 1 sagat 15 minut çemesi saklamak ýeterlikdir. Ol täzeje ýapylan tamdyr çöregi bilen saçaga äberilýär.
