Güýzki bag ekmek möwsümine badalga bermek bilen baglanyşykly 5-nji noýabrda Balkan atçylyk sport toplumynyň golaýyndaky meýdançada geçirilen ählihalk dabarasy Balkan welaýatynda hem ýokary ruhubelentlikde geçirildi. 2022-nji ýylyň 5-nji noýabrynda Balkan welaýat häkimligi, welaýat jemgyýetçilik guramalary, welaýat hukuk goraýjy edaralary, edara-kärhanlarda zähmet çekýän ýaşlar, talyplar, ýaşaýjylaryň müňlerçesi agaç nahallaryny oturtmak üçin öňden taýýarlanyp goýlan ýerlerde guralan ählihalk bag ekmek dabaralaryna uly hyjuw bilen gatnaşdylar. Köpçülikleýin bag nahallaryny oturtmak üçin saýlanyp alnan ýerler, sözüň doly manysynda, baýramçylyk keşbine beslendi. Sebitiň ähli şäherlerinde we etrap merkezlerinde hem ýokary ruhubelentlikde geçirildi. Medeniýet işgärleriniň çykyşlary adamlara ruhy lezzet paýlady. Seýrek duş gelýän muzeý gymmatlyklaryndan, senetçilige, amaly-haşam sungatyna, el işlerine degişli gurallardyr taýýar önümlerden, ýaşajyk bag nahallarynyň we gülleriň dürli görnüşlerinden guralan sergiler aýratyn many-mazmuna eýe boldy. Baglaryň ilkinji nahallaryny oturtmagyň ýaşuly nesliň wekillerine hem-de şol gün durmuş toýuny toýlaýan ýaş çatynjalara ynanylmagy ählihalk dabarasyna gatnaşyjylaryň ruhubelentligini has-da artdyrdy. Bu il-ýurt bähbitli çäräniň dowamynda welaýatyň ähli künjeklerinde ýaşuly nesliň wekilleriniň çagalarydyr agtyk-çowluklary bilen şahsy hojalyklarynyň mellek ýerlerinde miweli we saýaly baglaryň nahallaryny oturdýan pursatlaryny synlamak bolsa has-da täsirli boldy.Ýurdumyzyň gülläp ösmegi, bagy-bossanlyga bürenmegi üçin gijesini gündiz edýän Arkadagly Serdarymyza Alkyş sözleri belentden ýaňlandy.
Ennebike ANNAGELDIÝEWA,
TMÝG-niň Balkan welaýat Geňeşiniň
guramaçylyk bölüminiň sanly ulgam
boýunça esasy hünärmeni.
