Kitap — bilimleriň binýadydyr. Ýaşlar bu binýady gurmaga ymtylmak bilen ömür ýolunda dowamat dowam boljak kämil ömür binýadyny gurýarlar. Kitap adamyň aňynda kemala gelýän pikirleriniň we durmuş akymynyň arasyndaky arabaglanyşygy sazlamak bilen özboluşly täsir edýän güýçdür. Sebäbi kitapda gudrat jemlenendir. Keramat saýylýan sözler adamyň kalbyny baglap, ýagşy umytlara, ýagty ertirlere tarap ýol açýar.
Häzirki wagtda hormatly Prezidentimiziň taýsyz tagallasy bilen döwrebap kitaphanalar bina edilýär. Ol edil “paýhaslar köşgüni” ýadyňa salýar.Bu ajaýyp köşkler Diýarymyzyň gözelligine gözellik goşýar we onuň bilen berk sazlaşyp, kitap gözelligini janlandyrýar. Daşoguz topragynda açylan täze döwrebap kitaphana hem munuň aýdyň mysalydyr. Teleýaýlym arkaly syn edýän mahalyň, tizden-tiz paýhas köşgüne baryp, mukaddes ojagyň arzyly okyjysyna öwrülmek islegini has-da möwç urýar.
Häzirki wagtda çaphana işini kämilleşdirmek, onuň maddy-enjamlaýyn ulgamyny pugtalandyrmak işi ýokary depginde alnyp barylýar. Çap etmegiň kämil usullary we halkara tejribeleri ornaşdyrylýar. Dünýäniň iň öňdebaryjy we kämil tehnologiýalary esasynda döwrebap enjamlaşdyrylmagy ýurdumyzda çykarylýan neşir önümleriniň hilini has-da kämilleşdirýär.Hormatly Prezidentimiziň taýsyz tagallasy bilen kitaphana işiniň gerimi giňelip, ýurdumyzyň ähli künjeklerinde kitap dükanlarynyň we wirtual kitaphana torunyň işi hem ýola goýulýar. Bu dükanlarda elýeterli nyrhlarda islän kitabyňy satyn alyp bolýar. Şeýle mümkinçilikler üçin kitapsöýüjiler Gahryman Arkadagymyza, Arkadagly Serdarymyza alkyş aýdýarlar.
Gahryman Prezidentimiziň, Arkadagly Serdarymyzyň janlary sag, ömürleri uzak, belent başlary aman bolsun!
Gurbanmyrat GURBANOW,
Türkmenistanyň Magtymguly adyndaky Ýaşlar
guramasynyň Daşoguz welaýatynyň Köneürgenç
etrap Geňeşiniň guramaçylyk bölüminiň müdiri.
