Bedenterbiýe we sport jemgyýetiň sagdynlygyny üpjün edýän gymmatlykdyr. Türkmenistanda bu ulgamy ösdürmek döwlet syýasatynyň ileri tutulýan ugurlarynyň biridir. Öňde goýlan wezipeleri amala aşyrmak maksady bilen, ýurtda bu ugurdaky hereketleriň täze usullary kemala getirilýär, ussat türgenleri taýýarlamak ugrunda toplumlaýyn özgertmeler amala aşyrylýar, Olimpiýa hereketiniň ösdürilmegine uly goşant goşulýar. Ýaş nesliň beden taýdan güýçli, ruhy taýdan sagdyn bolmaklaryny gazanmak, olaryň sportuň dürli görnüşlerine we bedenterbiýä bolan gyzyklanmasyny has-da ösdürmek maksady bilen ýaşlaryň, umumy bilim berýän orta mekdepleriniň okuwçylarynyň arasynda yzygiderli sport çäreleri, bäsleşikleri geçirilýär.
2023-nji ýylyň 12-nji maýynda Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşi, ýurdumyzda ýaşlary sagdyn, berk bedenli, ruhubelent edip terbiýelemek hem-de ata-babalarymyzdan miras galan sport oýunlaryny ýaşlara ýetirmek maksady bilen Kerki etrabynyň 22-nji orta mekdebiniň 10-11-nji synp okuwçylarynyň arasynda sportuň “Küşt” görnüşi boýunça “Sport kämillige badalga” atly sport bäsleşigi geçirildi. Bäsleşikde mekdebiň 11-nji synp okuwçysy Y.Kasymow I-orna, B.Abraýewa II-orna, B.Döwranow III-orna mynasyp boldular. Bäsleşikde ýeňiji bolanlara Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşi tarapyndan hormat hatlary gowşuryldy.
Atajan JORAÝEW,
Türkmenistanyň Magtymguly adyndaky
Ýaşlar guramasynyň Lebap welaýatynyň
Kerki etrap Geňeşiniň guramaçylyk
bölüminiň müdiri.
