Gazagystan Respublikasynyň Almaty şäherinde geçirilen söweş jiu-jitsusy boýunça Aziýanyň çempionaty Türkmenistanyň milli ýygyndy toparyna 31 medal getirdi.Ýaryşa gatnaşan türkmen toparyna 13 türgen wekilçilik etdi.16 döwletden 150-ä golaý türgeniň gatnaşmagy ýaryşyň duşuşyklarynyň dartgynly geçmegini şertlendirdi.
Ýaryşyň birinji güni jiu-jitsunyň«fullcontact»görnüşi boýunça dartgynly duşuşyklary özünde jemledi.Aşgabat şäherindäki 84-nji orta mekdebiň 9-njy synp okuwçysy Günperi Nazarowa 53 kg-de, 19-njy orta mekdebiň 9-njy synp okuwçysy Kaýumberdi Döwletow 80 kg-den ýokary agramda Aziýanyň çempionlary boldular. «Olimp» orta sport mekdebiniň 11-nji synp okuwçysy Şyhberdi Rahmanow 60 kg-de, ýygyndy toparymyzyň türgeni Ahmet Taňryberdiýew 63 kg-de, Ahal welaýatynyň bedenterbiýe we sport baradaky Baş müdirliginiň Gökdepe etrabynyň Gökdepe daýhan birleşiginiň sport mekdebiniň tälimçisi Şatlyk Çaryýew 80 kg-de, «Algap» hususy kärhanasynyň hünärmeni Jelilmuhammet Hojamyradow 77 kg-de hem-de Mary welaýatynyň bedenterbiýe we sport baradaky Baş müdirliginiň Wekilbazar etrabynyň 1-nji sport mekdebiniň tälimçisi Aýsoltan Garçowowa 80 kg-den ýokary agram derejesinde hormat münberiniň ikinji basgançagyna çykdylar.
45 kg-de Ýaş olimpiýaçylary taýýarlaýyş mekdebiniň 10-njy synp okuwçysy Musa Kasymow, 60 kg-de Aşgabat şäherindäki 107-nji orta mekdebiň 11-nji synp okuwçysy Yslam Öwezow, 65 kg-de hem şol mekdebiň okuwçysy Muhammedaly Gurbanow öz ýaş derejelerinde bürünç medal gazandylar.Ulularyň arasynda Türkmen döwlet bedenterbiýe we sport institutynyň talyplary Saýara Awezmetowa (50kg) hem-de Mergen Durdyýew (70kg) öz çykyşlaryny bürünç medal bilen jemlediler.
Ýaryşyň ikinji gününde «closecontact» boýunça geçirilen bäsleşiklerde Günperi Nazarowa 53kg-de, Kaýumberdi Döwletow 80 kg-den ýokary agramda, Şyhberdi Rahmanow 60 kg-de, Aýsoltan Garçowowa 80 kg-den ýokary agramda altyn medala mynasyp boldular. Yslam Öwezow (60 kg), Muhammedaly Gurbanow (65 kg) we Saýara Awezmetowa (50 kg) dagy kümüş medal gazansa, Mergen Durdyýew (70 kg) hormat münberiniň üçünji basgançagynda ornaşdy.
Aziýa çempionatynyň üçünji gününde «graundfight» ýaryşlarynyň ýeňijileri kesgitlendi. Günperi Nazarowa (53 kg) bu gezekki çykyşyny kümüş medal bilen jemledi.
Kaýumberdi Döwletow (80 kg), Şyhberdi Rahmanow (60 kg), Aýsoltan Garçowowa (80 kg), Yslam Öwezow (60 kg), Muhammedaly Gurbanow (65 kg) hem-de Saýara Awezmetowa (50 kg) Aziýanyň çempionlary hökmünde bellige alyndy.
Türkmen döwlet binagärlik-gurluşyk institutynyň 3-nji ýyl talyby Isa (70 kg) we Musa Kasymowlar (50 kg) ýaryşdan kümüş medally dolandylar.
Jelilmuhammet Hojamyradow 77 kg-de, Mergen Durdyýew 70 kg-de bürünç medala eýe boldular.
Şeýlelikde, Türkmenistanyň milli ýygyndy topary ýurdumyzyň baýrak gaznasyny 11 altyn,12 kümüş we 8 bürünç medal bilen baýlaşdyrdy.
«Türkmen sporty».
