Berkarar döwletiň täze eýýamynyň Galkynyşy döwründe Gahryman Arkadagymyzyň «Ömrümiň manysy» atly edebi-filosofik eseri halkymyzyň asyrlaryň dowamynda nesilden-nesle geçip gelýän milli ruhy-ahlak gymmatlyklarynyň özboluşly şöhlelenmesi boldy. Bu kitap türkmen halkynyň geçmişi, ahlak gymmatlyklary, pederlerimizden miras galan parahatçylyk söýüjilik, döredijilik ýörelgeleri barada gyzykly maglumatlar bilen tanyşmaga mümkinçilik döredýär. Hormatly Arkadagymyz ata-babalarymyzyň asylly ruhy gymmatlyklaryna sarpa goýmak bilen, biziň günlerimize çenli ýetip gelen çeşmeleri we maglumatlary içgin seljerip, olar dogrusynda eserinde giňişleýin durup geçýär. «Ömrümiň manysy» atly eser «Ýaşaýyş medeniýeti», «Ynanç hakynda söz», «Müň ýyllyklaryň jümmüşinden gaýdýan ýol-ýörelge», «Gadymyýete nazar», «Mukaddes Mekge Medinä zyýarat», «Milletiň ruhy-ahlak mekdebi» atly bölümlerden ybarat bolup, kitapda geçmişiň görnükli şahsyýetleriniň we filosoflarynyň, dünýäniň danalarynyň pähimli sözleri edebi taýdan ussatlyk bilen beýan edilýär. Hormatly Arkadagymyzyň türkmen halkynyň baý medeniýetini we milli mirasyny giňden dabaralandyrýan bu eseri terbiýeçilik mekdebiniň gözbaşyny özünde jemleýär.
Kitaba sarpa goýmakda, ylym-bilimi ösdürmekde nusgalyk tejribeleri durmuşa geçirýän Türkmen halkynyň Milli Lideri, Gahryman Arkadagymyzyň «Ömrümiň manysynyň dowamaty» atly täze kitabynyň çapdan çykmagy, türkmen halkyny diýseň buýsandyrdy. Bu täze kitapda geçilen ýollar, edilen işler bilen bir hatarda, durmuşy özgertmegiň, Türkmenistany mundan beýläk-de ösdürmegiň geljekki ugurlary baradaky pikir-garaýyşlar beýan edilýär. Kitapda «Ömrümiň manysy — il-halkym», «Hakydada orun alan pursatlar», «Ýagşy adam ýatdan çykmaz», «Watan —enäniň kalby», «Beýik Ýüpek ýoluny dikeltmek ugrunda», «Terbiýe — bagtyýarlygyň çeşmesi», «Mertebeli ýaşaýşyň manysy», «Ömrüňiz uzak bolsun!» ýaly bölümler bolup, olarda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň durmuş ýolunyň dürli tapgyrlary baradaky giňişleýin maglumatlar öz beýanyny tapýar. Biz ýaşlar üçin gollanma bolup duran bu kitaplary peşgeş berýän Gahryman Arkadagymyza alkyşlarymyz çäksizdir. Ýaş nesilleri watansöýüji, arassa ahlakly, belent adamkärçilikli, ruhubelent, giň dünýägaraýyşly, ylymly-bilimli adamlar edip ýetişdirmekde olaryň kitaba söýgüsini, okamak höwesini artdyrmagyň örän uly ähmiýeti bar. Ýaş nesliň bagtyýar durmuşy, röwşen geljegi barada taýsyz tagallalary edýän ýurdumyzda ähli ugurlar bilen bir hatarda ylym-bilim ulgamynyň, kitaphana işiniň kämilleşdirilmegi babatda hem giň mümkinçilikleri döredip berýän, her bir işinde ýüreginde-kalbynda berkarar döwletimize buýsanç duýgulary möwç urýan, bagtyýar ýaşlar baradaky aladalary naýbaşy orunda goýýan Türkmen halkynyň Milli Lideri Gahryman Arkadagymyzyň, Arkadagly Serdarymyzyň janlary sag, ömürleri uzak, belent başlary hemişe aman bolup, döwletli işleri rowaçlyklara beslensin!
Ennebike ANNAGELDIÝEWA,
Türkmenistanyň Magtymguly adyndaky Ýaşlar guramasynyň
Balkan welaýat Geňeşiniň guramaçylyk bölüminiň
sanly ulgam boýunça esasy hünärmeni.
