Ýurdumyzda döwrebap çagalar sagaldyş we dynç alyş merkezlerinde ýatdan çykmajak pursatlara beslenen tomusky dynç alyş möwsümi dowam edýär. Golaýda çagalaryň tomusky dynç alyş möwsümleriniň täsirli we guramaçylykly geçirilmegini gazanmak maksady Türkmenistanyň Magtymguly adyndaky Ýaşlar guramasynyň Balkan welaýat Geňeşi, Balkan welaýatynyň PM-niň PÝGB-i, bilen bilelikde “Gara-altyn” çagalar sagaldyş we dynç alyş merkezinde “Zähmetsöýerlik!” atly şygar astynda birnäçe bäsleşikleri geçirdi. Geçirilen bäsleşikler diýdeň çekeleşikli ýagdaýda geçip, bagtyýar nesillerimiziň şadyýan gülki sesleri has joşgunly ýaňlandy. Sebäbi salkyn saýaly deňiziň kenary gözel künjeklerinde çagalar uly alada we söýgi bilen gurşalansoň, olaryň şadyýan gülki sesleri belentden-belent ýaňlanýar. Gojaman Hazaryň kenarynda ýerleşýän “Gara-altyn” çagalar sagaldyş we dynç alyş merkezinde bagtdan paýly, sylagdan serpaýly çagalar ýaş aýratynlygyna görä birnäçe toparlara bölünip, her topara terbiýeçi-mugallymlar berkidilýär. Merkezlerde çagalaryň her güni göwün göteriji pursatlara beslenýär. Olarda dynç alýan çagalardan döredilen aýdym-saz, tans, folklor, çeper okaýyş toparlarynyň çykyşlarynyň yzygiderli guralmagy, şeýle-de bagtyýar nesilleriň arasynda sportuň dürli görnüşleri boýunça ýaryşlaryň, ýol hereketiniň düzgünlerini, ýangyn howpsuzlygyny berjaý etmek, adatdan daşary ýagdaýlarda özüňi alyp barmagyň düzgünleri boýunça tejribe okuwlarynyň we toparlaýyn bäsleşikleriň, sagdyn durmuş ýörelgelerini wagyz edýän çäreleriň guralmagy uly gyzyklanma döredýär. Şeýle çärelere işjeň gatnaşýan çagalaryň höweslendirilip durulmagy bolsa olarda özboluşly ruhubelentlik döredýär. Çagalaryň arasynda şeýle bäsleşikleriň geçirilmegi netijesinde bolsa ýaş nesillerimiziň ukyp-başarnygyna göz ýetirmäge mümkinçilik berýär. Şadyýan çagalar bilen dürli görnüşli bäsleşikleriň geçirilmeginiň aýratyn ähmiýetini bellemelidiris. Sebäbi zehinli, gujurly, maksadaokgunly çagalary ýüze çykarmakda örän uly ähmiýeti bardyr. Bäsleşiklerde tapawutlanan çagalara Türkmenistanyň Magtymguly adyndaky Ýaşlar guramasynyň Balkan welaýat Geňeşiniň ýadygärlik sowgatlarynyň gowşurylmagy olarda uly ruhubelentlik duýgusyny döreydi. Şeýle ajaýyp mümkinçiliklerden ylham-joşgun alýan bagtyýar çagalar eziz Watanymyzda ýaş türkmenistanlylara ýokary amatlyklara eýe bolan sagaldyş-dynç alyş şertlerini yzygiderli döredip berýän Türkmen halkynyň Milli Lideri Gahryman Arkadagymyza, Ýaşlaryň Hak Howandary Arkadagly Serdarymyza egsilmez alkyş aýdýarlar.Halkymyzyň geljegini bagtyýar etmek, sagdyn nesli kemala getirmek ugrunda uly möçberli işleri amala aşyrýan Türkmenistanyň Halk Maslahatynyň başlygy Alym Arkadagymyzyň hormatly Prezidentimiz Arkadagly Serdarymyzyň janlary sag, ömürleri uzak, belent başlary aman bolsun
Ennebike Annageldiýewa,
TMÝG-niň Balkan welaýat Geňeşiniň guramaçylyk
bölüminiň sanly ulgam boýunça esasy hünärmeni.
