Şanly ýylymyzyň tomus paslynyň şu günlerinde Lebap welaýatynyň zähmetsöýer daýhanlary ýene bir möwsüme, ýagny pagta ýygymyna gyzgalaňly taýýarlyk görýärler. Welaýatymyzyň bagtyýar ýaşlary hem bu jogapkärli möwsümi üstünliklere beslemekde öz zähmetlerini gaýgyrmaýarlar. Olar gowaçalara talabalaýyk ideg etmekde zerur hasaplanýan agrotehniki çäreleriň geçirilmeginde aýratyn işjeňlilik, gaýratlylyk görkezýärler. Ir ertirden giç agşama çenli gowaçaly pellerde zähmet çekýän ýaşlary görmek göwünleri galkyndyrýar. Çünki olar Gahryman Arkadagymyzyň we hormatly Prezidentimiziň özlerine bildiren uly ynamyny ödemekde yhlasyny gaýgyrman, ýadawlygy bilmän zähmet çekýärler.
Biziň Halaç etrabymyzyň ekerançylyk meýdanlarynda hem şu günler asylly zähmet gaýnap joşýar. Gowaça meýdanlarynda kärendeçilerimiz dökün bermek, suwarmak, haşal otlardan arassalamak ýaly zerur işleri wagtynda alyp barýarlar. Olar ekine zyýan berijilere garşy göreşmegiň hem üstünlikli hötdesinden gelýärler. Bu işlerde, ýagny daýhan aladalarynyň ýerine düşmeginde ýaş mehanizatorlaryň, sürüjileriň aýratyn tagalla edýändiklerini ýatlamak gerek. Olar öz iş şertlerini wagtly-wagtynda talabalaýyk guramak bilen daýhanlaryň ýakyn ýardamçylaryna öwrülýärler. Hormatly Prezidentimiz Arkadagly Serdarymyzyň tagallalary bilen ýurdumyzyň oba hojalyk pudagyny galkyndyrmak maksady bilen dünýä belli kompaniýalaryň tehnikalarynyň satyn alnyp berilmegi bolsa, zähmetkeş halkymyzda uly ruhubelentlik ýagdaýyny döredýär. Daşary ýurtlaryň kämil tehnikalary oba hojalyk işleriniň has netijeli alnyp barylmagyna ýardam edýär. Şu ýylyň başyndan bäri oba hojalyk işleriniň dürli görnüşlerinde ulanylýan daşary ýurtlaryň kuwwatly tehnikalaryň ýüzlerçesiniň welaýatymyza getirilendigi ýatlamak gerek. «Polat atlara» ussatlyk bilen erk edýän mehanizator ýigitlerimiz şeýle goldaw-hemaýatlary üçin hormatly Prezidentimiz Arkadagly Serdarymyza hoşallyk sözlerini aýdýarlar.
Gowaça ideg etmek işleriniň ýany bilen kärendeçilerimiz şalynyň talabalaýyk boý almagy, bitginli hasyl bermegi ugrunda hem tagallalaryny gaýgyrmaýarlar. Amyderýanyň bol mele suwundan ganýan bereketli topraklarymyz hem yhlas edýän zähmetkeşlerimize ýylyň-ýylyna bol hasyl eçilip dur. Gowaça we bereketli ekinleriň biri bolan şala ideg etmekde etrabymyzyň «Altyn asyr», «J.Mähremow» adyndaky, «Magtymguly» daýhan birleşiklerinde joşgunly zähmetiň bat alýandygyny uly buýsanç bilen aýdasymyz gelýär. Yhlasy ýerine düşýän etrabymyzyň daýhanlary Arkadag Serdarly bagtyýar ýaşlar ýylynda hem ýurdumyzda azyk bolçulygynyň döredilmegine özleriniň mynasyp goşandyny goşmagy maksat edinýärler. Biz hem ýygy-ýygydan bereketli pellerde zähmetkeş daýhanlaryň arasynda bolup, olaryň armasyny ýetirip durýarys. Ata Watanymyzda işlemek, halal zähmet çekmek ugrunda giň mümkinçilikleri döredip berýän hormatly Prezidentimiz Arkadagly Serdarymyza ýaş mehanizatorlarymyzyň, kärendeçilerimiziň ýürekleri alkyşdan doly.
Gözel AMANSÄHEDOWA,
Türkmenistanyň Magtymguly adyndaky
Ýaşlar guramasynyň Halaç etrap
Geňeşiniň bölüm müdiri.
