Hormatly Prezidentimiziň raýatlarymyz dogrusynda edýän aladasynyň aýdyň beýanyna öwrülen «Ýol hereketiniň howpsuzlygy — ömrümiziň rahatlygy» atly biraýlyk maksatnamasy ýurdumyzyň ähli ýerlerinde işjeň hereket edýär. Umumybilim berýän orta mekdeplerde we kiçi ýaşly çagalar baglarynda zähmet çekýän mugallymlar hem-de terbiýeçiler döredilýän amatly mümkinçiliklerden ruhlanyp, ýaş nesillere bilim-terbiýe bermekde, ýol hereketiniň kadalaryny we düzgünlerini çuňňur düşündirmekde yhlasly zähmet çekýärler.
Biziň ýurdumyz bagtly çagalygyň, egsilmez şatlygyň we ruhubelentligiň ýurdudyr. Ýaş nesilleriň saglygy, bagtyýarlygy we döwrebap bilim-terbiýe almagy ugrunda hormatly Prezidentimiz ýadawsyz aladalary edýär. Kiçi ýaşly çagalar baglarynda körpejeler üçin ähli mümkinçilikler döredilýär. Okuwa, durmuşa girişmegine ýardam bermäge, ugur-ýol görkezmäge, bu babatda başlangyç düşünjeleriň olaryň aňynda berkemeginde terbiýeçiler terbiýeçilik ähmiýetli sapaklary arkaly yhlasly çemeleşýärler we tutanýerli zähmet çekýärler. Hormatly Prezidentimiziň ýolbaşçylygynda ýurdumyzda giň gerimde geçirilýän «Ýol hereketiniň howpsuzlygy — ömrümiziň rahatlygy» atly biraýlyk çäreleri ýurdumyzyň ähli kiçi ýaşly çagalar baglaryny hem gurşap alýar. Ýörite baýlaşdyrylan ýolyşyk meýdançalarynda ýolyşykdan geçmegiň düzgünlerine dahylly sapaklar geçirilýär. Şeýle-de, taýýarlanylan dürli şekilleriň, diwarlyklaryň we suratly şekilleriň üsti bilen körpeler ýolyşyk bilen tanyşdyrylýar, biläýmeli ýönekeýje kadalary düşündirilýär, täsirli oýunlaryň üsti bilen bolsa, olary has-da işjeň çekmäge çalşylýar. Bu bolsa, berilýän sapaklaryň we aýdylýan zatlaryň olaryň aňynda tiz bekemegine ýardam edýär.
Türkmenistanyň Magtymguly adyndaky Ýaşlar guramasynyň Daşoguz welaýat, şäher, etrap Geňeşleri meýilnama laýyklykda çagalar baglarynda, umumybilim berýän orta mekdeplerde wagyz-nesihat çärelerini, şeýle hem köçe-ýol hereketine bagyşlanan bäsleşikleri, oýun häsiýetleri çäreleri yzygiderli geçirýär. Şeýle çäreleriň ählisi ilkinji nobatda ýaş nesilleriň aladasydyr.
Biz — ýaşlar hormatly Prezidentimiziň bildirýän ynamyny ödäp, yhlasly zähmet çekmelidiris! Biz üçin ähli şertleri döredýän Gahryman Arkadagymyzyň, hormatly Prezidentimiziň janlary sag, ömürleri uzak, tutýan her bir tutumly işleri mundan beýläk-de rowaç alsyn!
Magsat OTUZOW,
Türkmenistanyň Magtymguly adyndaky
Ýaşlar guramasynyň Daşoguz welaýat
Geňeşiniň başlygy.
