Golaýda Türkmenistanyň Magtymguly adyndaky Ýaşlar guramasynyň Daşoguz welaýat Geňeşi welaýatyň häkimligi, welaýatyň oba hojalyk önümçilik birleşigi, “Daşoguzpagta” önümçilik birleşigi bilen bilelikde, ýetişdirilen pagta hasylynyň çalt we ýitgisiz ýygnalmagyny gazanmak maksady bilen, ýaş ýygymçylaryň, pagtaçy kärendeçileriň we kombaýnçylaryň arasynda “Ak altynym – ak bagtym” atly zähmet bäsleşiginiň Arkadag Serdarly bagtyýar ýaşlar ýyly tapgyryny hem-de Hasyl toýy mynasybetli, “Daýhandan hereket – ýerden bereket” şygary astynda aýdym-sazly dabara gurady. Ýokary guramaçylyk ýagdaýynda geçirilen hem-de baýramçylyk ruhuna beslenen bu çäre Daşoguz şäher häkimliginiň mejlisler jaýynda geçirildi. Oňa edara-kärhanalarda zähmet çekýän öňdebaryjy işgärler we ýaşlar gatnaşdylar.
Bäsleşikde “Ýüwrük elli ýygymçy” ugry boýunça Saparmyrat Türkmenbaşy etrabyndan Myrat Otuzow, Akdepe etrabyndan Aýjeren Altybaýewa, Şabat etrabyndan Gulşoda Zairowa, “Ak altynyň ussady” ugry boýunça kärendeçilerden Boldumsaz etrabyndan Şeker Nagmatullaýewa, Görogly etrabyndan Oguljemal Babajanowa hem-de Ýazbibi Allamyradowa, “Ökde kombaýnçy” ugry boýunça mehanizatorlardan Köneürgenç etrabyndan Ýagşygeldi Begjanow, Saparmyrat Türkmenbaşy etrabyndan Serdar Söwedow, Görogly etrabyndan Hoşgeldi Gylyjow dagylar degişlilikde 1-nji, 2-nji, 3-nji orunlara mynasyp bolup, olar zähmet bäsleşiginiň ýeňijileri diýlip yglan edildiler. Welaýatyň öňdebaryjy ýaş zähmetkeşlerine Türkmenistanyň Magtymguly adyndaky Ýaşlar guramasynyň Daşoguz welaýat Geňeşiniň Hormat hatlary hem-de ýadygärlik sowgatlary gowşuryldy.
Soňra baýramçylyk çäresinde Hasyl toýy mynasybetli, çykyşlara we gutlaglara giň orun berildi. Çykyş edenler ýurdumyzyň oba hojalyk pudagynyň esasy ugurlarynyň biriniň pagtaçylykdygy, ýerden bol pagta hasylynyň alynmagy üçin ähli mümkinçilikleriň döredilýändigi, şonuň netijesinde, ýyl-ýyldan ata Watanymyzda belent-belent “ak altynly” harmanlaryň döredilýändigi, zähmetsöýer babadaýhanlaryň yhlasynyň ýerine düşýändigi dogrusynda ýürek buýsançlaryny, gutlaglaryny we hoşallyklaryny beýan etdiler.
Dabarada Daşoguz şäher medeniýet merkeziniň medeniýet-sungat ussatlarynyň ýerine ýetiren belentden-belent, ajaýypdan-ajaýyp aýdym-sazly çykyşlary baýramçylyk dabarasyna öwüşgin paýlady.
Magsat OTUZOW,
TMÝG-niň Daşoguz welaýat Geňeşiniň başlygy,
Türkmenistanyň Mejlisiniň deputaty.
