Öňňin Türkmenistanyň Magtymguly adyndaky Ýaşlar guramasynyň döredilen güni mynasybetli her ýylda yglan edilýän ýurdumyzyň zähmetde, döredijilikde aýratyn tapawutlanan ýaşlaryna gowşurylýan Türkmenistanyň ýaşlar baýragyna Arkadag Serdarly bagtyýar ýaşlar ýylynda mynasyp bolan Arkadag şäherinde zähmet çekýän, okap bilim alýan bagtyýar ýaşlaryň gatnaşmagynda «tegelek stoluň» başyndaky söhbetdeşlik geçirildi. Ony Türkmenistanyň Magtymguly adyndaky Ýaşlar guramasynyň Arkadag şäheriniň Geňeşi gurady.
Söhbetdeşligiň barşyndaky çykyşlarda Berkarar döwletimiziň täze eýýamynyň Galkynyşy döwründe bagtyýarlyga beslenen Watanymyzda «Ýaşlar barada döwlet syýasaty hakynda» Türkmenistanyň Kanunyndan gelip çykýan wezipeleri durmuşa geçirmekde alnyp barylýan işler, bu ugurda ýaşlaryň iri jemgyýetçilik guramasy bolan Türkmenistanyň Magtymguly adyndaky Ýaşlar guramasynyň hyzmatlary dogrusynda täsirli gürrüňler edildi.
Mälim bolşy ýaly, Arkadag Serdarly bagtyýar ýaşlar ýylynda guramanyň işi has-da giň gerime eýe boldy. Muny bu şanly ýylda Türkmenistanyň Magtymguly adyndaky Ýaşlar guramasynyň Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Bütindünýä Ýaşlar jemgyýetine resmi agzalyga goşulmagy hem aýdyň görkezýär.
«Ýaşlaryň şäheri» adyna eýe bolan Arkadag şäherinde hem Türkmenistanyň Magtymguly adyndaky Ýaşlar guramasynyň Arkadag şäheriniň Geňeşi hereket edip, işe başlanyna uzak wagt geçmänkä şäheriň çäginde hereket edýän orta, ýörite orta, ýokary okuw mekdeplerinde bilim alýan talyp ýaşlaryň, dürli edara-kärhanalarda zähmet çekýän öňdebaryjy ýaşlaryň agramly bölegini agzalyga kabul etdi. Meýilnamalaýyn işleri ýola goýmak bilen, häzirki wagtda guramanyň Arkadag şäheriniň Geňeşi tarapyndan gujur-gaýratly, ylymly, bilimli, watansöýüji, dörediji we gurujy ýaşlary terbiýelemek maksady bilen wagyz-nesihat çäreleri, maslahat duşuşyklary, sport ýaryşlary, döredijilik bäsleşikleri yzygiderli geçirilýär. Munuň özi oňyn netijesini berip, häzirki wagtda Watanymyza wepaly, türkmençilik ýol-ýörelgelerine ygrarly, zähmetsöýer nesiller kemala gelýär. Muny ýurdumyzyň zähmetde, döredijilikde aýratyn tapawutlanan ýaşlaryna gowşurylýan Türkmenistanyň ýaşlar baýragyna Arkadag şäherinden 15 sany ýaşlaryň eýe bolmagy-da tassyklaýar.
Mälim bolşy ýaly, Arkadag Serdarly bagtyýar ýaşlar ýylynda ýaşlaryň başlangyçlaryna, ukyp-başarnyklaryna, döredijilik gözleglerine, şol sanda halkara ýaşlar hyzmatdaşlygyna aýratyn ähmiýet berilýär.
Nesip bolsa geljekde hem Halkymyzyň Milli Lideri Gahryman Arkadagymyzyň nusgalyk göreldesine eýerip, Döwlet Baştutanymyz Arkadagly Gahryman Serdarymyzyň «Biz ýaşlara eziz Watanymyzyň geljegini gurujylar hökmünde garaýarys, olar jemgyýetiň iň işjeň bölegidir» diýip bildirýän beýik ynamyny ödäp, halal zähmet çekjek nesilleri terbiýelemek işlerini has-da giň gerimde alyp bararys.
Biz ýaşlaryň hak howandarlary Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, il ähmiýetli, ýurt bähbitli tutýan tutumly işleri hemişe rowaçlyklara beslensin!
Umyda KAKAÝEWA,
Türkmenistanyň Magtymguly adyndaky Ýaşlar guramasynyň
Arkadag şäheriniň Geňeşiniň bölüm müdiri.
