Ýakynda Türkmenistanyň Magtymguly adyndaky Ýaşlar guramasynyň Balkan welaýat Geňeşi, Türkmenistanyň Mejlisiniň deputaty, hukuk goraýjy edaralary, welaýat jemgyýetçilik guramalary bilen bilelikde Balkanabat şäheriniň Iňlis dili, fizika we matemetika okuw derslerini çuňlaşdyrylyp öwredilýän ýöriteleşdirilen 22-nji orta mekdebinde bilim alýan ýokary synp okuwçylaryň arasynda wagyz-nesihat duşuşygyny geçirdi. Duşuşykda çykyş edenler 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylmagy, Gündogaryň beýik akyldary we nusgawy şahyry Magtymguly Pyragynyň goşgularyndaky terbiýeçilik ähmiýetli öwüt-nesihatlaryny, millilik, däp-dessur we edep-terbiýe kadalaryny, sagdyn-durmuş ýörelgelerini, maşgala gymmatlygyny, gelin-gyzlarymyzda türkmen halkyna mahsus bolan asyllylygy, utanç-haýalylygy, päkizeligi, ula hormat, kiçä sarpa goýmagy terbiýelemek dogrusynda belläp geçdiler.
Çykyşlaryň her birinde biziň şeýle eşretli, parahat durmuşymyzyň we asuda ýaşaýşymyzyň sakasynda duran türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli alyp barýan işleriniň rowaç bolmagyny arzuw etdiler.
Gözel SAPARMÄMMEDOWA,
TMÝG-niň Balkan welaýat Geňeşiniň Guramaçylyk bölüminiň müdiri.
