16-njy martda Türkmenistanyň Magtymguly adyndaky Ýaşlar guramasynyň Daşoguz welaýat Geňeşi welaýatyň häkimligi, jemgyýetçilik guramalary hem-de edara-kärhanalary bilen bilelikde, Arkadagly Gahryman Serdarymyzyň parasatly başlangyçlary esasynda badalga berlen ýazky ählihalk bag ekmek dabarasyny geçirdi. Oňa welaýat, şäher, etrap häkimlikleriniň, jemgyýetçilik guramalarynyň, edara-kärhanalarynyň ýolbaşçylarydyr jogapkär işgärleri, il sylagly ýaşulular, kümüş saçly eneler, ýokary we orta hünär okuw mekdepleriniň mugallymlarydyr talyplary, ýaşaýjylar hem-de ýaşlar gatnaşdylar. Baýramçylyk ruhuna beslenen dabarada welaýatyň medeniýet-sungat ussatlarynyň, bagşy-sazandalarynyň belent owazly çykyşlary oňa gatnaşanlara ruhy lezzet paýlady. Daşoguz şäheriniň halkara aeroportunyň golaýynda geçirilen çärede saýaly, miweli, pürli nahallaryň müňlerçesi oturdyldy.
Bu çärä Arkadagly Gahryman Serdarymyzyň sargytlaryny özlerine ýörelge we görelde edinýän Türkmenistanyň Magtymguly adyndaky Ýaşlar guramasynyň Daşoguz welaýat, şäher, etrap Geňeşleriniň işgärleri, işjeň agzalary hem ýokary ruhubelentlikde hem-de işjeňlikde gatnaşdylar. Bu zähmet baýramçylygy ýurdumyzda ekologiýa we daşky gurşawy goramak syýasatynyň üstünlikli durmuşa ornaşdyrylýandygynyň nobatdaky aýdyň subutnamasy boldy.
Aýnur ÝUSUPOWA,
TMÝG-niň Daşoguz welaýat Geňeşiniň bölüm müdiri.
