Golaýda Türkmenistanyň Magtymguly adyndaky Ýaşlar guramasynyň Daşoguz welaýatynyň Şabat etrap Geňeşi, etrabyň häkimligi, jemgyýetçilik guramalary bilen bilelikde, Milli bahar baýramy – Halkara Nowruz güni mynasybetli, etrabyň «Dostluk» seýilgähinde «Nowruz geldi ilime» atly aýdym-sazly baýramçylyk dabarasyny geçirdi. Oňa il sylagly ýaşulular, mährem eneler, edara-kärhanalaryň wekilleri gatnaşdylar. Dabarada etrap medeniýet merkeziniň aýdym-saz, tans toparlary özleriniň ajaýyp çykyşlary bilen dabara gatnaşanlara şatlyk paýladylar. Baýramçylyk dabarasynda bagtyýar çagalar özleriniň taýýarlan aýdym-sazly çykyşlary, tanslary, goşgulary bilen çykyş etdiler. Bagtyýarlygyň, ruhubelentligiň, täzelenişiň nyşany hökmünde gadymy döwürlerden bäri bellenip gelinýän Nowruz baýramynyň dabarasynda ýaňlanan aýdym-sazlarda berkarar döwletimiziň, eşretli zamanamyzyň waspy öz aýdyň beýanyny tapdy.
Soltanmyrat ALLABERENOW,
TMÝG-niň Daşoguz welaýatynyň
Şabat etrap Geňeşiniň bölüm müdiri.
