Garaşsyz Watanymyzda Berkarar döwletiň täze eýýamynyň Galkynyşy döwründe demokratiýanyň dabaralanýan, raýat agzybirliginiň pugtalanýan döwletimizde raýatlaryň hukuklary we azatlyklary goralyp, isleg-arzuwlary hasyl bolýar. Her bir adam erkin, azat, döredijilikli zähmet çekip, durmuşyň hözirini görüp ýaşaýar. Sahawatly Lebap topragynda täze metjidiň açylmagy-da ýurdumyzda halkymyzyň döwletlilik, ynsanperwerlik ýörelgeleriniň dabaralanýandygynyň, gadymyýetden gözbaş alýan milli däp-dessurlarymyzyň dowam etdirilýändiginiň we ösdürilýändiginiň ýene-de bir subutnamasydyr. Adamlary halallyk, ynsanperwerlik, päk ýüreklilik ruhunda terbiýelemekde, ýagşylyga çagyrmakda, ajaýyp häsiýetleri oýarmakda yslam dininiň uly ähmiýeti bar. Şoňa görä-de, döwletimizde ata-babalarymyzyň bu ugurdaky taglymatlaryna gyşarnyksyz eýerilýär.
Soňky ýyllarda ýurdumyzyň beýleki welaýatlarynda-da döwrebap baş metjitleriň birnäçesi gurlup ulanylmaga berildi. «Pähim-paýhas ummany Magtymguly Pyragy» ýylynyň Oraza aýynda Milli Liderimiziň hut özüniň Ahal welaýatynda täze metjidi açyp ulanmaga bermegi bu aýyň sahawatly günleriniň ähmiýetiniň has-da artdyrdy. Gahryman Arkadagymyz Ahal welaýatyndaky metjidiň açylyş dabarasynda sözlän taryhy çykyşynda bu mukaddes aýyň Gadyr gijesinde ýurdumyzyň ähli welaýatlarynda hem täze metjitleriň açyljakdygy baradaky hoş habary göwünlere ylham nuruny paýlady. Şol sahabata baý günde şeýle şatlykly wakanyň şaýady bolmak bolsa biziň bagtyýar döwrümize bolan buýsanjymyzy has-da artdyrdy.
Gadyr gijesi güni biziň Lebap welaýatymyzyň Hojambaz etrabynyň Döwletli şäherçesinde hem gurlan täze 300 orunlyk metjit we onuň ýanynda sadaka berilýän binasy açylyp ulanylmaga berildi. Sahawatly Lebap topragynda täze metjidiň gurulmagy hem gadymyýetden gözbaş alýan milli däp-dessurlarymyzyň mynasyp dowam etdirilýändiginiň we ösdürilýändiginiň ýene-de bir subutnamasyna öwrüldi. Ajaýyp metjit diňe binagärlik gurluşy, içerki we daşar bezegleri bilen däl-de, eýsem, abadanlaşdyrylan we bagy-bossanlyga bürelen ýanaşyk ýerleri bilen hem gözüňi dokundyrýar. Agşamlaryna bolsa metjidiň özboluşly reňk öwüşginleri ýaşaýjylarymyzyň göwünlerine ylham, ýagşylyk nuruny paýlaýar.
Ýurdumyzyň durmuşyndaky möhüm ähmiýetli wakalaryň, döwletli tutumlaryň hormatyna, şeýle hem etrabymyzda täze metjidiň gurlup, ulanylmaga berilmeginiň hatyrasyna toý sadakasy berildi. Metjitde edilen ýagşydan ýagşy arzuwlarda, doga-dileglerde mähriban halkymyzyň abadançylygyny, onuň baý medeni we ruhy mirasyny gorap saklamak barada edýän atalyk aladalary üçin Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagy arzuw edildi. Goý, sogaply wakanyň hormatyna okalan aýat-töwirler, edilen ähli dilegler, berlen toý sadakasy Beýik Biribaryň dergähinde kabul bolsun! Türkmen topragynda hemişe bagtyýarlyk, abadançylyk dabaralansyn!
Türkmen halkynyň abadançylygyny, onuň baý medeni we ruhy mirasyny gorap saklamak üçin giň mümkinçilikleri döredip berýän Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, tutýan tutumly işleri elmydama rowaçlyklara beslensin!
Şöhrat KADYROW,
TMÝG-niň Lebap welaýatynyň Hojambaz etrap
Geňeşiniň Guramaçylyk bölüminiň müdiri.
