Ýaňy-ýakynda Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi, Görogly etrabynyň çagalar sungat mekdebi bilen bilelikde, “Tebigaty söýmek – Watany söýmek” atly şygar astynda döredijiligiň surat çekmek ugry boýunça bäsleşik geçirdi. Ýaşlaryň arasynda ekologiýa medeniýetini ösdürmek, ýaşlarda şekillendiriş sungatynyň üsti bilen ata Watanymyza, gözel tebigatymyza söýgüni kemala getirmek, täze ýaş zehinleri ýüze çykarmak maksady bilen geçirilen döredijilik bäsleşiginde Görogly etrabynyň çagalar sungat mekdebiniň nakgaş hünärinde okaýan okuwçylar eminler topary tarapyndan bellenen wagtyň dowamynda ata Watanymyzyň gaýtalanmajak gözel tebigatynyň dürli görnüşlerdäki täsin gözelliklerini öz başarnyklaryna görä, ak kagyzyň ýüzünde şekillendirdiler. Bäsleşikde bu mekdebiň 3-nji synp okuwçylary Selbi Nurýagdyýewa, Kakamyrat Arazow, Gunça Tuwakowa dagylar öz ukyp-başarnyklary bilen beýleki okuwçylardan saýlanyp, degişlilikde 1-nji, 2-nji, 3-nji orunlary eýelediler. Döredijilik bäsleşiginiň ýeňijilerine Ýaşlar guramasynyň ýerli Geňeşiniň Görogly etrabynyň çagalar sungat mekdebi bilen bilelikdäki Hormat hatlary gowşuryldy.
Döwran HALYLOW,
Daşoguz welaýatynyň Görogly etrabynyň çagalar
sungat mekdebiniň nakgaş hünäriniň mugallymy,
TMÝG-niň işjeň agzasy.
