Ýaňy-ýakynda Görogly etrabynyň medeniýet öýünde hormatly Prezidentimiziň jöwher zehininden syzylyp çykan «Änew – müňýyllyklardan gözbaş alýan medeniýet» atly kitabynyň tanyşdyrylyş dabarasy boldy. Etrap häkimliginiň, etrap Ýaşlar guramasynyň, etrabyň jemgyýetçilik guramalarynyň guramagynda geçen dabara edara-kärhanalaryň işgärleri, Mejlisiň deputatlary, etrap halk maslahatynyň agzalary, jemgyýetçilik guramalarynyň wekilleri, il sylagly ýaşulular, mährem eneler hem-de ýaşlar gatnaşdylar.
Dabarada Türkmenistanyň Demokratik partiýasynyň etrap komitetiniň başlygy Nurmyrat Şamyradow, Görogly etrabynyň ýaşaýjysy, il sylagly ýaşuly Rejepgeldi Ýazgurbanow, mährem ene Haljan Arazmedowa, etrap hassahanasynyň baş lukmanynyň orunbasary, Mejlisiň deputaty Kakamämmet Nepesow, Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşiniň başlygy, etrap halk maslahatynyň agzasy Hudaýnazar Meredow, Türkmenistanyň Kärdeşler arkalaşyklarynyň Görogly etrap birleşmesiniň başlygy Şasenem Orazowa, Türkmenistanyň Agrar partiýasynyň Görogly etrap komitetiniň başlygy Döwletmyrat Durdyýew, etrap merkezi kitaphanasynyň işgäri Ogulboldy Öwezowa dagylaryň Arkadagly Gahryman Serdarymyzyň «Änew – müňýyllyklardan gözbaş alýan medeniýet» atly täze kitabynyň çapdan çykmagynyň şan-şöhratly taryhymyzy, milli medeniýetimizi, sungatymyzy giň äleme ýaýýan, halkymyzyň at-abraýyny dünýä ýüzünde dabaralandyrýan şanly waka öwrülendigi baradaky buýsançly çykyşlary örän täsirli boldy. Dabara gatnaşyjylar şöhratly taryhymyzy, milli ruhy-medeni mirasymyzy äleme ýaýyp, Berkarar döwletiň täze eýýamynyň Galkynyşy döwründe ýurdumyzyň dünýä dolan abraý-mertebesini has-da belende göterýän Arkadagly Gahryman Serdarymyzyň ýiti zehininden döräp, giň okyjylar köpçüliginiň söýgüsine mynasyp bolýan şeýle eserleriniň höwrüniň köp bolmagyny arzuw etdiler. Soňra etrabymyzyň medeniýet we sungat ussatlarynyň aýdym-sazly çykyşlary ajaýyp wakanyň şanyna geçirilen dabaranyň toý ruhubelentligini belende göterdi. Arkadagly Gahryman Serdarymyzyň taýsyz tagallalary bilen, güneşli Diýarymyzda amala aşyrylýan beýik ösüş-özgertmeleriň, taryhy döwrümiziň, bagtyýar durmuşymyzyň sungat çykyşlarynda joşgunly wasp edilmegi kalplary heýjana getirdi.
Dabara gatnaşanlar türkmen halkynyň Milli Lideri Gahryman Arkadagymyza, Arkadagly Gahryman Serdarymyza halkymyzyň abadan durmuşy üçin alyp barýan işleriniň mundan beýläk-de uly rowaçlyklara beslenmegini arzuw etdiler.
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
