Berkarar döwletiň täze eýýamynyň Galkynyşy döwründe oba zähmetkeşleri ýene-de möhüm möwsümiň — galla oragynyň üstünlikli geçirilmegine we jemlenmegine özleriniň mynasyp goşantlaryny goşýarlar. Biziň Lebap welaýatymyzyň babadaýhanlary-da möwsüminiň başlanmagy bilen ýetişdirilen hasyly ýitgisiz ýygnap almak boýunça öz başarnyklaryny gaýgyrmaýarlar. Olar Watanymyzyň galla harmanynyň gün-günden beýgelmegine özleriniň mynasyp goşantlaryny goşýarlar. Şu günler öz kärende ýerlerinde bol hasyl ýetişdirip, galla oragyna gatnaşyp, bellenilen meýilnamalaryny üstünlikli berjaý edýän ildeşlerimiziň buýsançlaryny görmek, olaryň şatlygyny paýlaşmak ýakymly ýagdaýlary döredýär. Ildeşlerimiziň ruhubelentligini artdyrmak maksady bilen Lebap welaýatynyň Köýtendag etrabynyň medeniýet işgärleri-de oba zähmetkeşleriniň arasynda bolup, dürli medeni çäreleri yzygiderli geçirýärler. Olar ýygy-ýygydan kärendeçileriň, mehanizatorlaryň we olara hyzmat edýän beýleki işgärleriniň arasynda bolup, özleriniň ajaýyp aýdymlary, sazlary, tanslary we sahna eserleri bilen olaryň armasyny ýetirýärler.
Ýakynda Köýtendag etrabynyň gallaçylary bilen etrabyň medeniýet we sungat işgärleriniň döredijilik duşuşygy hem geçirildi. Ony Türkmenistanyň Demokratik partiýasynyň Köýtendag etrap komiteti we Türkmenistanyň Magtymguly adyndaky Ýaşlar guramasynyň Köýtendag etrap Geňeşi bilelikde gurady. Aýdym-saz dabaraly baýramçylyga öwrülen bu çärede etrabyň medeniýet işgärleri Watanymyzyň asudalygyny, Arkadagly Gahryman Serdarymyzyň durmuşa geçirýän beýik işlerini, ildeşlerimiziň ene topraga söýgisini öz çykyşlarynda beýan etdiler. Aýdym-sazlar, dürli tanslar ussatlyk bilen ýerine ýetirilip, gallaçylara ruhy lezzet paýladylar. Etrap kitaphanasynyň işgärleriniň bu ýerde guran göçme sergisi hem gallaçylarda uly gyzyklanma döretdi. Çäräniň dowamynda Köýtendag etrabynyň galla meýdanlarynda ýetişdirilen hasyly çalt we zaýasyz ýygnap almakda tapawutlanan mehanizatorlara ýadygärlik sowgatlary dabaraly ýagdaýda gowşuryldy.
Göwher MÖWLÝAMOWA,
TMÝG-niň Lebap welaýatynyň Köýtendag etrap
Geňeşiniň guramaçylyk bölüminiň esasy hünärmeni.
