Türkmenabat şäheriniň gözelligine aýratyn öwüşgin çaýýan «Türkmeniň ak öýi» binasynyň öňündäki meýdançada Türkmenistanyň Prezidentiniň yglan eden «Türkmeniň Altyn asyry» atly bäsleşiginiň çäklerinde geçirilýän «Ýaňlan, Diýarym!» telebäsleşiginiň Lebap welaýat tapgyry geçirildi. Oňa welaýatymyzyň ýaş estrada aýdymçylary gatnaşdylar.
Bäsleşikde ýerine ýetirilen aýdym-sazlarda ýurdumyzyň ösüşleri, bagtyýar döwrümizde ýetilýän belent sepgitler, gadymy we milli mukaddesliklerimiz öz beýanyny tapdy. Ýaş sahna ussatlarynyň ýerine ýetiren çykyşlary eminler toparynyň adalatly bahasyna we tomaşaçylaryň gyzgyn elçarpyşmalaryna mynasyp boldy. Bäsleşigiň netijeleri boýunça Halaç etrabyndan ýaş aýdymçy Saparmyrat Tekäýew we Türkmen döwlet çeperçilik akademiýasynyň talyby Serdar Jumaýew «Ýaňlan, Diýarym!» telebäsleşiginiň Lebap welaýat tapgyrynyň ýeňijileri diýlip yglan edildiler we bäsleşigiň döwlet tapgyryna gatnaşmaga hukuk gazandylar.
Laçyn AKYÝEWA,
TMÝG-niň Türkmenabat şäher Geňeşiniň
Guramaçylyk bölüminiň esasy hünärmeni.
