Ýakynda Türkmenistanyň Magtymguly adyndaky Ýaşlar guramasynyň Mary welaýatynyň Ýolöten we Türkmengala etrap Geňeşleriniň bilelikde guramagynda Täze ýyl baýramyna bagyşlanyp aýdym-sazly baýramçylyk dabarasy geçirildi.
«Ajaýyp agşam» toý mekanynda aýdym-sazly baýramçylyk dabarasyna kalplary Watan söýgüsinden doly bagtyýar ýaşlar uly ruhubelentlikde gatnaşdylar. Täze 2025-nji ýyl mynasybetli ýagşydan-ýagşy gutlag sözleri beýan edildi. Ýolöten, Türkmengala etraplarynyň medeniýet we sungat ussatlarynyň ýerine ýetiren çykyşlary baýramçylyk dabarasyna turuwbaşdan bezeg berdi.
Çäräniň ahyrynda oňa gatnaşanlar halkymyzy asuda, parahat, bolelin durmuşda ýaşadýan Gahryman Arkadagymyzyň, Arkadagly Gahryman Serdarymyzyň adyna alkyş sözlerini beýan etdiler.
Meretgeldi ANNAKULYÝEW,
TMÝG-niň Mary welaýatynyň
Ýolöten etrap Geňeşiniň başlygy.
