Berkarar döwletiň täze eýýamynyň Galkynyşy döwründe Gahryman Arkadagymyzyň başlangyçlary, Arkadagly Gahryman Serdarymyzyň taýsyz tagallalary bilen, döwletimiziň medeniýet diplomatiýasynyň dünýä ýüzünde giňden dabaralanýan ajaýyp eýýamydyr. Bu hakykata Türkmenistan döwletimiziň BMG-niň Bilim, ylym we medeniýet barada ýöriteleşdirilen edarasy bolan ÝUNESKO bilen alyp barýan özara bähbitli hyzmatdaşlyklary hem aýdyň şaýatlyk edýär.
Soňky onýyllyklaryň dowamynda Türkmenistanyň çäginde ýerleşýän, türkmen topragynyň gadymy medeniýetleriň — siwilizasiýalaryň ojagy bolandygyna aýdyň şaýatlyk edýän Gadymy Merw, Köneürgenç, Nusaý taryhy-medeni goraghanalarynyň çägine girýän ýadygärlikler toplumlary bu abraýly halkara guramasynyň Bütindünýä maddy medeni mirasynyň sanawyna girizildi.
Şu ýerde umumadamzat derejesinde alnanda, her bir halkyň, her bir milletiň asyrlardan, müňýyllyklardan aşyryp, öz ruhunda ýaşadyp gelýän, gündelik durmuşynda işjeň ýüzlenýän ruhy gymmatlyklarynyň bardygyna ünsi çekmek mümkindir. Bu döreýiş, kemala geliş kökleri taryhy çuňluklara siňip gidýän türkmen milli ruhy gymmatlyklary babatda hem şeýledir. Türkmen maddy däl medeni mirasy görnüşi taýdan köpdürlüdir, many-mazmuny babatda örän çuňdur. Hut şu nukdaýnazardan, Gahryman Arkadagymyzyň başyny başlamagynda we hormatly Prezidentimiziň taýsyz tagallalary bilen ösüp gelýän ýaş nesilleriň aňynda watançylyk duýgularyny ösdürmek, şol bir wagtda dünýä jemgyýetçiligine giňden ýaýmak üçin häzirki güne çenli şol gymmatlyklaryň onlarçasy ÝUNESKO-nyň Umumadamzat maddy däl medeni mirasynyň görnükli nusgalarynyň sanawyna girizildi. Olara mysal hökmünde «Görogly» dessançylyk sungatyny, «Küştdepdi» aýdymly, hereketli milli oýnuny, milli halyçylyk sungatyny, milli keşdeçilik sungatyny, dutar ýasamak, aýdym aýtmak we saz çalmak sungatyny, milli at bezemek däplerini we beýlekileri belläp geçmek bolar.
Şeýle-de Magtymguly Pyragynyň golýazmalarynyň ÝUNESKO-nyň «Dünýäniň hakydasy» atly maksatnamasynyň sanawyna girizlmegi, Türkmenistanyň 2023-nji ýylyň noýabrynda ÝUNESKO-nyň Bedenterbiýe we sport baradaky Hökümetara geňeşiniň agzalygyna kabul edilmegi hemişelik Bitarap döwletimiziň bu abraýly halkara edarasy bilen özara bähbitli gatnaşyklaryny barha giň gerimde we köptaraply ösdürýänligini aýdyň aýan edýär.
Häzirki wagta çenli Türkmenistanyň çäginde taryhy-medeni ýadygärlikleriň bir müňden gowragy ýüze çykarylandyr. Munuň özi özara bähbitli gatnaşyklaryň dowamata uzajakdygyna şaýatlyk edýän buýsançly hakykatdyr.
Mämmetoraz ORAZBERDIÝEW,
Türkmenistanyň Magtymguly adyndaky
Ýaşlar guramasynyň Balkanabat şäher Geňeşiniň
Guramaçylyk bölüminiň baş hünärmeni.
