Türkmen halkymyzyň baý taryhy-medeni mirasy bu günki gün dünýä medeniýetiniň aýrylmaz bölegine öwrülýär. Bu ugurda BMG-niň Bilim, ylym we medeni miras baradaky edarasy ÝUNESKO bilen alnyp barylýan özara bähbitli hyzmatdaşlyklar aýratyn ähmiýetlidir.
Türkmen medeniýeti diýlende, ilkinji nobatda, nepis halylar bilen bezelen türkmen ojagynyň gözelligi, keşde bilen bezelen owadan milli lybaslary, şaý-seplere beslenen ajaýyp ahal-teke atlary, gaýduwsyzlygy bilen tanalýan alabaýy, şirin mukamy bilen maýyl edýän dutary göz öňüne gelýär. Ata-babalarymyzdan, ene-mamalarymyzdan galan medeni mirasymyzyň baý gaznasyna girýän ähli gymmatlyklar sanardan kändir. Şu nukdaýnazardan milli medeni mirasymyzy dikeltmek, gorap saklamak, öwrenmek we dünýä ýaýmak şu günki bagtyýar nesillerimiziň öňünde durýan wajyp wezipedir.
Berkarar döwletiň täze eýýamynyň Galkynyşy döwründe döredilýän çuňňur manyly sahna oýunlary, döwrebap kinofilmler, aýdym-sazly tanslar, yzygiderli guralýan medeni çäreler we bäsleşikler, döredijilik festiwallary, sergiler türkmen we dünýä tomaşaçylaryna türkmen medeniýetiniň köptaraply many-mazmunyna, döredýän ruhy gözelliklerine çuňňur aralaşmaga ýardam edýär.
Medeniýet we sungat işgärleriniň netijeli işlemekleri, döredijilik bilen meşgullanmaklary, mähriban Watanymyzyň dürli ulgamlarda gazanýan üstünliklerini wagyz etmekleri üçin ähli şertleri döredip berýän Gahryman Arkadagymyza, Arkadagly Gahryman Serdarymyza ähli halkymyzyň, bagtyýar ýaş nesilleriň alkyşlary egsilmezdir.
Ennebike ANNAGELDIÝEWA,
Türkmenistanyň Magtymguly adyndaky Ýaşlar
guramasynyň Balkan welaýat Geňeşiniň
Umumy bölüminiň müdiri.
