Ýakynda Türkmenistanyň Magtymguly adyndaky Ýaşlar guramasynyň Ahal welaýatynyň Kaka etrap Geňeşiniň hem-de etrabyň beýleki jemgyýetçilik guramalarynyň bilelikde guramagynda Kaka dokma toplumynyň mejlisler zalynda Türkmenistanyň Halk Maslahatynyň alyp barýan işleriniň jemgyýetçilik-syýasy ähmiýetini ilata düşündirmek maksady bilen wagyz-nesihat duşuşygy geçirildi.
Etrabyň edara-kärhanalarynda, jemgyýetçilik guramalarynda zähmet çekýän ýaşlaryň gatnaşmagynda geçen duşuşykda ýurdumyzyň durmuşynda bolup geçýän şanly wakalar, halk hojalygynyň dürli ugurlarynda gazanylýan üstünlikler, ýetilýän sepgitler hakda gürrüň edildi. Şeýle-de duşuşykda çykyş edenler Türkmenistanyň Halk Maslahatynyň alyp barýan işleriniň jemgyýetçilik-syýasy ähmiýeti barada giňişleýin gürrüň bermek bilen, Watanymyzyň şan-şöhratyny has-da belende götermekde, halkymyzyň agzybirligini, bitewüligini, jebisligini, abadançylygyny berkitmekde, ýaşaýyş-durmuş derejesini ýokarlandyrmakda Halk Maslahatynyň möhüm ähmiýete eýedigini aýratyn nygtadylar.
Täsirli geçen duşuşygyň ahyrynda oňa gatnaşanlar halkymyzyň bagtyýar durmuşda ýaşamagy, ýurdumyzyň has-da gülläp ösmegi ugrunda taýsyz tagallalary edýän Gahryman Arkadagymyzyň we Arkadagly Gahryman Serdarymyzyň adyna alkyş sözlerini beýan etdiler.
Begenç ÖWEZOW,
Türkmenistanyň Magtymguly adyndaky Ýaşlar guramasynyň
Ahal welaýatynyň Kaka etrap Geňeşiniň başlygy.
