Halkara parahatçylyk we ynanyşmak ýylynyň noýabr aýynyň ikinji ýekşenbesinde Ahal welaýatynda hem Hasyl toýunyň dabaralary egsilmez ruhubelentlige we şatlyk-şowhuna beslenip, uludan bellenildi. Bereket-bolçulygy alamatlandyrýan ajaýyp baýramyň dabarasyna Türkmenistanyň Magtymguly adyndaky Ýaşlar guramasynyň welaýat, etrap Geňeşleriniň işgärleri we işjeň agzalary uly hyjuw bilen gatnaşdylar.
Ak bugdaý etrabynyň çägindäki Nowruz ýaýlasynda «Türkmeniň ak öýi» binasynyň öňündäki meýdançanyň daş-töweregini toý joşguny gurşap aldy. Ol ýerdäki sungat çykyşlarynda ösüş-özgertmeli taryhy döwrümiziň, zähmetsöýer halkymyzyň waspy öz beýanyny tapdy. Dabaranyň barşynda öňdebaryjy oba zähmetkeşleriniň, hasyl ussatlarynyň uly toparyna hormatly Prezidentimiziň adyndan gymmat bahaly sowgatlar gowşuryldy.
Toý ruhundaky ýaýlada milli öwüşginli şüweleňler ýaýbaňlandyryldy. Oba hojalyk önümleriniň, amaly-haşam sungatynyň, zergärçilik önümleriniň sergisi uly gyzyklanma döretdi. Bu ýerdäki baýramçylyk dabarasy ýatda galyjy duýgulara baý boldy.
Dabara gatnaşanlar daýhan zähmetine belent sarpa goýýan, ýurdumyzy bereket-bolçulygyň mekanyna öwürýän hormatly Prezidentimiziň we Gahryman Arkadagymyzyň adyna alkyş sözlerini aýtdylar.
Täjinar ALLANUROWA,
Türkmenistanyň Magtymguly adyndaky Ýaşlar guramasynyň
Ahal welaýat Geňeşiniň sanly ulgam boýunça esasy hünärmeni.
