Ýakynda, Lebap welaýatynyň Kerki etrabynyň Türkmenistanyň Gahrymany Atamyrat Nyýazow adyndaky 24-nji orta mekdebinde Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşiniň hem-de Kerki etrabynyň bilim bölüminiň bilelikde guramagynda etrabyň umumbilim berýän orta mekdepleriniň 3 – 5-nji synplarynda okaýan okuwçy oglanlarynyň arasynda yglan edilen «Merdana nesil – 2025» atly şadyýan bäsleşigiň etrap tapgyry geçirildi.
Bäsleşikde okuwçy oglanlar üç şert boýunça bäsleşip, Bitarap ýurdumyzy, bagtyýar çagalygy wasp edýän aýdymlary ýerine ýetirip, şorta sözleri aýdyşyp, öz döredijilik ukyplaryny görkezmegi başardylar. Bäsleşigiň emin agzalarynyň gelen netijelerine görä, Lebap welaýatynyň Kerki etrabynyň 25-nji orta mekdebiniň 4-nji synp okuwçysy Oraz Jumageldiýew I orna, Lebap welaýatynyň Kerki etrabynyň 35-nji orta mekdebiniň 5-nji synp okuwçysy Ýeňiş Berdiliýew II orna, Lebap welaýatynyň Kerki etrabynyň Türkmenistanyň Gahrymany Atamyrat Nyýazow adyndaky 24-nji orta mekdebiň 5-nji synp okuwçysy Seýitkulow Hudaýnazar III orna mynasyp boldular. Bäsleşikde ýeňiji bolan okuwçylara hem-de bäsleşige gatnaşanlara Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşi tarapyndan Hormat hatlary we ýadygärlik sowgatlar gowşuryldy.
Bäsleşigiň ahyrynda oňa gatnaşanlar, şeýle ajaýyp zamanada ýaşlara ýaşamaga, okamaga, öwrenmäge, bäsleşmäge uly şertleri döredip berýän türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza çäksiz alkyş sözlerini aýtdylar.
Oýdin AŞIROWA,
Türkmenistanyň Magtymguly adyndaky Ýaşlar guramasynyň
Lebap welaýatynyň Kerki etrap Geňeşiniň Guramaçylyk
bölüminiň baş hünärmeni.
