ŞADYÝAN BÄSLEŞIGIŇ AHAL WELAÝAT TAPGYRY GEÇIRILDI

Ýakynda Änew şäheriniň Medeniýet öýünde Türkmenistanyň Magtymguly adyndaky Ýaşlar guramasynyň Merkezi Geňeşi hem-de Bilim ministrligi tarapyndan ýurdumyzyň orta mekdepleriniň 3—5-nji synp okuwçy oglanlarynyň arasynda yglan edilen «Merdana nesil — 2025» atly şadyýan bäsleşigiň Ahal welaýat tapgyry geçirildi. Türkmenistanyň Magtymguly adyndaky Ýaşlar guramasynyň Ahal welaýat Geňeşiniň hem-de welaýat Baş bilim müdirliginiň bilelikde guramagynda ýokary guramaçylyk derejesinde geçirilen şadyýan bäsleşige welaýatymyzyň ähli etraplaryndan zehinli okuwçy oglanlar gatnaşdylar.

Medeni ojagyň owadan sahnasyny okuwçy oglanlaryň bäsleşigiň şertleri esasynda ýerine ýetiren şadyýan çykyşlary tomaşaçylara ruhubelentlik we şatlyk paýlady. Okuwçy oglanlaryň joşgunly aýdym-sazlary gözel Diýarymyzyň, ajaýyp döwrümiziň, bagtyýar çagalygyň, dost-doganlygyň waspy bolup, ýüreklere ylham eçildi.

Bäsleşigiň dowamynda emin agzalar çagalaryň çykyşlaryna mynasyp baha berip, ýeňijileri kesgitlediler. Netijede, «Merdana nesil — 2025» atly şadyýan bäsleşigiň welaýat tapgyrynda Bäherden etrabynyň tebigy ugurly dersleri çuňlaşdyryp öwredýän ýöriteleşdirilen 27-nji orta mekdebiň 5-nji synp okuwçysy Umyt Rzagulyýew birinji, Ak bugdaý etrabynyň 7-nji orta mekdebiniň 3-nji synp okuwçysy Begmyrat Akmämmedow ikinji, Tejen etrabynyň 25-nji orta mekdebiniň 3-nji synp okuwçysy Gurbandurdy Gurbandurdyýew üçünji orny eýelediler. Bäsleşigiň ýeňijilerine we oňa gatnaşyjylara Türkmenistanyň Magtymguly adyndaky Ýaşlar guramasynyň Ahal welaýat Geňeşiniň sowgatlary dabaraly ýagdaýda gowşuryldy.

Annadurdy WALLAKOW,

Türkmenistanyň Magtymguly adyndaky

Ýaşlar guramasynyň Ahal welaýat

Geňeşiniň baş hünärmeni.