Meniň balam ýekedir,
Rysgy düýe ýüküdir,
Ogşuk, torum götermez,
Iner, maýa ýüküdir.
Mergen oglum guş ursun,
Dagdan keýik düşürsin,
Düýä ýükläp getirsin,
Goňşulara süýşürsin.
Meniň gyzym Maýadyr,
Öz öýmüziň aýydyr,
Çyksa düýe sagmana,
Bulut oňa saýadyr.
Akmaýa lälä kakar,
Owazy jana ýokar,
Kejebesin bezejek
Düýebaşlyklar dokar.
Allan-allan,hemişe,
Kerwen gitdi argyşa,
Kerwen gelsin oljaly,
Bezeneliň kümüşe.
Äpet kersen gaýmagy,
Boz goýunyň böwregi,
Arwananyň ogşugy,
Akmaýanyň köşegi.
Ýeňňesine ýelmaýa,
Heniz azdyr gyzyma,
Agasyna akmaýa
Heniz azdyr gyzyma,
Daýysyna dal bedew
Heniz azdyr gyzyma,
Hüwwä – hüw!
