Ýakynda Türkmenistanyň Jemgyýetçilik guramalarynyň Merkezi binasynda Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň hem-de «Aşgabat» teleýaýlymynyň bilelikde gurnamagynda «tegelek stoluň» başynda söhbetdeşlik duşuşygy geçirildi. «Pähim-paýhas ummany Magtymguly Pyragy» ýylynyň möhüm jemgyýetçilik-syýasy wakasy hökmünde taryha altyn harplar bilen ýazyljak Türkmenistanyň Halk Maslahatyna taýýarlyk görmek, ony halk köpçüligine ýetirmek, ilatyň arasynda wagyz-nesihat etmek maksady bilen geçirilen duşuşyga Türkmenistanyň Mejlisiniň deputaty, Bagtyýarlyk etrap halk maslahatynyň agzasy gatnaşdylar.
Ata Watanymyzyň mukaddes Garaşsyzlyk baýramynyň öň ýanynda, Türkmenistanyň Halk maslahatynyň nobatdaky Mejlisini geçirmek indi asylly däbe öwrüldi. Şoňa görä-de Hormatly Prezidentimiziň ýakynda geçirilen Ministrler Kabinetiniň giňişleýin mejlisinde Garaşsyzlyk baýramynyň bellenilýän günlerinde Türkmenistanyň Halk Maslahatynyň nobatdaky mejlisiniň geçiriljekdigini aýdyp, oňa häzirden düýpli taýýarlyk görüp başlamagyň zerurdygyny tabşyrmagy bilen, 20-nji iýulda Türkmenistanyň Halk Maslahatynyň Prezidiumynyň Karary kabul edildi. Karara laýyklykda, bu umumymilli forumy şu ýylyň 24-nji sentýabrynda çagyrmak we ony Maslahat köşgünde geçirmeklik bellenildi. Duşuşyga gatnaşanlar öz çykyşlarynda, bu möhüm taryhy senäni ýokary guramaçylykly geçirmek ugrunda döwlet derejesinde alnyp barylýan işler dogrusynda giňişleýin gürrüň berdiler.
Çäräniň ahyrynda oňa gatnaşanlar şeýle ajaýyp döwletli döwrany peşgeş beren Türkmen halkynyň Milli Lideri Gahryman Arkadagymyza, Arkadagly Gahryman Serdarmyza alkyş sözlerini aýtdylar.
Mähriban ŞYHMYRADOWA,
TMÝG-niň Aşgabat şäher Geňeşiniň
Guramaçylyk bölüminiň baş hünärmeni.
