Golaýda ene-mamalarymyzdan gelýän millilik hakyndaky düşünjeleri we keşdeçilik sungatynyň ähmiýetini gelin-gyzlarymyza ýetirmek, şeýle hem ýaşlaryň hünär taýdan taýýarlygyna ýardam bermek we milli däp-dessurlarymyza, milli el işlerimize söýgi döretmek maksady bilen, Mary şäherindäki «Bagt köşgi» toý dabaralar merkezinde aýdym-sazly çäre geçirildi. Türkmenistanyň Magtymguly adyndaky Ýaşlar guramasynyň Mary welaýatynyň Mary şäher Geňeşiniň, Hydyr Derýaýew adyndaky Mugallymçylyk mekdebiniň bilelikde gurnamagynda geçirilen çärä talyp gyzlar uly ruhubelentlik bilen gatnaşdylar.
Aýdym-sazly dabaranyň barşynda ýurdumyzda hormatly Prezidentimiziň parasatly baştutanlygynda milli mirasymyzy öwrenmek we ösdürmek ugrunda möhüm işleriň alnyp barylmagy, sungat derejesine ýetirilen nusgalyk mirasymyzyň we keşdeçiligiň gadyr-gymmaty hakynda buýsançly çykyşlar edildi. Çykyşlarda türkmen keşdeçilik sungatynyň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilendigine aýratyn üns çekildi, şeýle hem talyp gyzlar sünnälenip elde çekilýän keşdeleriň waspyny aýdym-sazlaryň üsti bilen giňişleýin beýan etdiler. Bu bolsa, çäräniň täsirini has-da artdyrdy.
Çäräniň ahyrynda milli däp-dessurlarymyzy geljekki nesillere ýetirmäge we el işlerimizi döwrebap görnüşde dünýä ýaýmaga giň mümkinçilikleri döredip beren Gahryman Arkadagymyza, Arkadagly Gahryman Serdarymyza alkyş sözleri aýdyldy.
Mähri SAPAROWA,
TMÝG-niň Mary welaýatynyň Mary şäher
Geňeşiniň Guramaçylyk bölüminiň esasy hünärmeni.
