Ýurdumyzda «Türkmenistanda ýaşlar baradaky döwlet syýasatynyň 2021 – 2025-nji ýyllar üçin Döwlet maksatnamasyny» amala aşyrmak boýunça ýerine ýetirilmeli çäreleriň meýilnamasyndan ugur alyp, körpe nesilleriň döredijilik ukyplaryny we zehin başarnyklaryny ýüze çykarmak maksady bilen goşgy, aýdym aýtmak boýunça çäreler geçirilýär.
Golaýda Sakarçäge etrabyndaky 7-nji çagalar bakja-bagynda «Berkarar döwletiň bagtyýar nesli» ady bilen goşgy we aýdym aýtmak boýunça bäsleşik geçirildi. Bäsleşigi Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşi hem-de Sakarçäge etrabyndaky 7-nji bakja-bagy bilelikde gurap, oňa ady agzalan çagalar bakja-bagynyň körpeleri uly höwes bilen gatnaşdylar.
Işjeň ýagdaýda geçen ýaryşda TMÝG-niň Mary welaýatynyň Sakarçäge etrap Geňeşiniň, etrabyň bilim bölüminiň hünärmenleri eminlik etdiler. Gyzykly häsiýete eýe bolan bäsleşikde körpe nesliň wekilleri aýdymdyr goşgulary uly joşgun bilen ýerine ýetirdiler. Çekeleşikli geçen bäsleşik bu çagalar bakja-bagynda terbiýelenýän körpeleriň çärä aýratyn taýýarlyk görendiklerini aýdyňlygy bilen görkezdi. Bagtly çagalaryň ýerine ýetiren şygyrlarynda, aýdymlarynda ajaýyp döwrümize, bagtyýar zamanamyza buýsanç duýgulary beýan edildi. Dabaraly çäre täsirli pursatlara örän baý boldy.
«Pähim-paýhas ummany Magtymguly Pyragy» ýylynda geçirilen bu ýaryş ýaş nesliň wekilleriniň edebiýata, sungata höwesjeňdiginiň aýdyň nyşanydyr. Bu bolsa, bäsleşige gatnaşyjylarda Watanymyzyň medeniýetini belende göterjek nesilleriň kemala gelýändigine ynamy berkitdi. Bäsleşikde ýeňiji bolan körpelere TMÝG-niň Mary welaýatynyň Sakarçäge etrap Geňeşiniň sowgatlary gowşuryldy.
Çärä gatnaşanlar şeýle ajaýyp zamanany peşgeş beren, ýurdumyzda çagalaryň bagtyýar ýaşamagy üçin ähli mümkinçilikleri döredip berýän Gahryman Arkadagymyza, Arkadagly Gahryman Serdarymyza alkyş sözlerini beýan etdiler.
Sähra UMMALYÝEWA,
TMÝG-niň Mary welaýatynyň Sakarçäge etrap
Geňeşiniň Guramaçylyk bölüminiň esasy hünärmeni.
