«Pähim-paýhas ummany Magtymguly Pyragy» ýylynda Arkadagly Gahryman Serdarymyzyň saýasynda nusgawy şahyrymyz Magtymguly Pyragynyň doglan gününiň 300 ýyllygyny dabaralandyrmakda ýurdumyzyň ähli künjekleri bilen bir hatarda biziň etrabymyzda hem dabaraly maslahatlar, döredijilik duşuşyklary giňden ýaýbaňlandyrylýar.
Şu nukdaýnazardan, ýaňy-ýakynda Türkmenistanyň Magtymguly adyndaky Ýaşlar guramasynyň Mary welaýatynyň Murgap etrap Geňeşiniň gurnamagynda «Şygyrlaryň dilde dessan, Magtymguly Pyragy!» ady bilen döredijilik bäsleşigi geçirildi. Murgap etrabynyň 9-njy orta mekdebinde geçirilen bäsleşige döredijilige höwesli okuwçy ýaşlar gatnaşdylar.
Magtymguly Pyragynyň öwüt-ündewlere ýugrulan şygyrlaryny ýaşlaryň arasynda wagyz etmek hem-de ýaşlarda akyldar şahyryň goşgularyny çeper okamaga höwes döretmek maksady bilen geçirilen bäsleşigiň başynda many-mazmunly çykyşlara orun berildi. Çykyş edenler Gahryman Arkadagymyzyň, Arkadagly Gahryman Serdarymyzyň Magtymguly Pyragynyň döredijiligine goýýan belent sarpasy, akyldar şahyryň giň ummana deňelýän şygryýeti dogrusynda aýratyn nygtadylar. Soňra bäsleşikde çykyş etjek okuwçy ýaşlara şowlulyk arzuw edildi.
Joşgunly gurşawy döreden bäsleşigiň dowamynda okuwçy ýaşlar Gündogaryň beýik akyldary, nusgawy şahyrymyz Magtymguly Pyragynyň şygyrlaryndan çeper okaýyşlary ýerine ýetirdiler. Bu bolsa,bäsleşige gatnaşanlarda uly täsir galdyrdy.
Şeýle hem bäsleşige gatnaşyjylaryň her biri ýurdumyzda döredijilik bilen meşgullanmaga giň mümkinçilikleri döredip berýän Gahryman Arkadagymyza we Arkadagly Gahryman Serdarymyza alkyş sözlerini buýsançly beýan etdiler.
Magtymguly Pyragynyň doglan gününiň 300 ýyllyk toýunyň toýlanylýan günlerinde şeýle ähmiýetli bäsleşikleriň geçirilmegi ýaşlaryň döredijilige has içgin çemeleşmeginde, olaryň döredýän eserleriniň kämilleşmeginde möhüm ähmiýete eýedir.
Nowruzgeldi MÄLIKOW,
TMÝG-niň Mary welaýatynyň Murgap etrap
Geňeşiniň Guramaçylyk bölüminiň esasy hünärmeni.
