Gahryman Arkadagymyzyň, Arkadagly Gahryman Serdarymyzyň saýasynda ýurdumyzda türkmen milli el işlerimiziň şöhratynyň täzeden belende göterilmegi ugrunda edilýän tagallalar milli mirasymyza, ajaýyp gymmatlyklarymyza goýulýan belent sarpanyň nyşanydyr. Şu maksat bilen, Türkmenistanyň Magtymguly adyndaky Ýaşlar guramasynyň Mary welaýatynyň Wekilbazar etrap Geňeşi hem-de Wekilbazar etrap bilim bölümi orta mekdeplerde bilim alýan okuwçy gyzlaryň arasynda dürli bäsleşiklerdir, döredijilik duşuşyklaryny yzygiderli geçirýärler.
Ýakynda, şeýle çäreleriň biri Wekilbazar etrabynyň 2-nji orta mekdebinde geçirildi. Türkmenistanyň Magtymguly adyndaky Ýaşlar guramasynyň Mary welaýatynyň Wekilbazar etrap Geňeşiniň etrabyň 2-nji orta mekdebi bilen bilelikde gurnamagynda geçirilen wagyz-nesihat çäresiniň esasy maksady okuwçy gyzlarda ýaşlykdan hünäre höwes döretmekden, ene-mamalarymyzdan gelýän el işleriniň inçe syrlaryny giňden wagyz etmekden ybarat boldy.
Çärede halkymyzyň «El hünäri – il gezer» diýen ajaýyp nakylyna eýerilip, gözbaşyny has irki döwürlerden alyp gaýdýan inçe we nepis el işleriniň türkmen zenanlarymyzyň zehininden, on barmagynyň täsin gudratyndan dörän ýürek owazydygy we ajaýyp sungatdygy dogrusynda giňişleýin çykyş edildi. Gahryman Arkadagymyzyň «Enä tagzym – mukaddeslige tagzym», «Arşyň nepisligi» ýaly ajaýyp kitaplarynyň bagtyýar ýaşlarymyzyň ýan kitabyna öwrülendigi, olary hünäre ugrukdyrmakda we el işlerimize bolan söýgini döretmekde ýol görkeziji şamçyragdygy baradaky täsirli gürrüňler bolsa, çykyşlaryň özenini düzdi.
Çäräniň dowamynda okuwçy gyzlar keşde çekmek-de, alaja örmek-de we tahýa gaýamak-da özleriniň ukyp-başarnyklaryny görkezdiler we olaryň taryhyny gyzykly tymsallaryň üsti bilen gürrüň berdiler. Sünnälenip ýerine ýetirilen el işler çärä özboluşly öwüşgin çaýdy.
Şeýle hem çärä gatnaşanlaryň her biri milli mirasymyzy we halkymyzyň buýsanjyna öwrülen milli el işlerimizi ösdürmäge ähli mümkinçilikleri döredip berýän Gahryman Arkadagymyza we Arkadagly Gahryman Serdarymyza çäksiz alkyşlaryny beýan etdiler.
Maral GARAHANOWA,
Mary welaýatynyň Wekilbazar etrabynyň
2-nji orta mekdebiniň mugallymy,
Ilkinji Ýaşlar guramasynyň başlygy.
