Ýakynda ýurdumyzda ýaşlar syýasatyny üstünlikli durmuşa geçirmek, özleri hakynda edilýän aladalary giňişleýin wagyz etmek maksady bilen, Türkmenistanyň Magtymguly adyndaky Ýaşlar guramasynyň Balkan welaýatynyň Bereket etrap Geňeşi etrap bilim bölümi hem-de etrap polisiýa bölümi bilen bilelikde Bereket etrabynyň 20-nji orta mekdebiniň okuwçylarynyň arasynda wagyz-nesihat duşuşygyny geçirdi. «Bilimli ýaşlar – Watanymyzyň geljegi» ady bilen geçirilen bu duşuşyga Türkmenistanyň Magtymguly adyndaky Ýaşlar guramasynyň etrap Geňeşiniň işgärleri, işjeň agzalary hem-de şol mekdebiň mugallymlarydyr okuwçylary gatnaşdylar.
Çykyşlarda ýurdumyzda ýaş nesilleriň döwrebap bilim almaklaryna, ata-babalarymyzdan gelýän milliligimize laýyklykda terbiýelenmegine, sagdyn ruhly we berk bedenli bolup ösüp ýetişmeklerine, hünär öwrenmeklerine gönükdirilen işleriň maksatnamalaýyn durmuşa geçirilýändigi aýratyn bellenildi.
Duşuşygyň ahyrynda oňa gatnaşyjylar ýurdumyzda ýaşlarymyzyň döwrebap ylym, bilim almaklary üçin taýsyz tagallalary edýän, halkymyzyň ýagty geljegi ugrunda beýik işleri durmuşa geçirýän Gahryman Arkadagymyza, peder ýoluny mynasyp dowam etdirýän hormatly Prezidentimiz Arkadagly Gahryman Serdarymyza alkyş sözlerini beýan etdiler.
Döwrandurdy ORAZDURDYÝEW,
TMÝG-niň Balkan welaýatynyň
Bereket etrap Geňeşiniň başlygy.
