Her ýylda geçirilmegi däbe öwrülen «Merdana nesil» atly şadyýan bäsleşigi «Pähim-paýhas ummany Magtymguly Pyragy» ýylynda hem giň gerime eýe boldy. Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň bilelikde yglan eden bu bäsleşiginiň şu günler Balkan welaýat tapgyry ýokary guramaçylykly geçirilýär.
Ýaş nesliň özboluşly baýramçylygyna öwrülen bäsleşige welaýatymyzyň 3-5-nji synp okuwçy oglanlarynyň örän taýýarlykly gelendigine göz ýetirmek diýseň ýakymly boldy. Olar şertleriň ählisini talabalaýyk ýerine ýetirmek bilen, zehin-başarnygyny doly derejede görkezdiler. Zehinli, aýdym-saz sungatyna höwesli, ruhubelent, giň dünýägaraýyşly çagalary ýüze çykarmak maksadyndan ugur alan bäsleşigiň dowamynda emin agzalary tarapyndan ýeňijiler kesgitlendi.
Eminleriň çykaran netijesine laýyklykda, «Merdana nesil – 2024» atly şadyýan bäsleşiginiň Balkan welaýat tapgyrynda baýrakly birinji orna Gyzylarbat etrabynyň 17-nji orta mekdebiniň 5-nji synp okuwçysy Paýhas Baýramsähedow, ikinji orna Balkanabat şäheriniň daşary ýurt dillerine ýöriteleşdirilen 3-nji orta mekdebiniň 3-nji synp okuwçysy Meretmyrat Myratjanow mynasyp boldular.
Ýeňijilere Türkmenistanyň Magtymguly adyndaky Ýaşlar guramasynyň Balkan welaýat Geňeşi tarapyndan Hormat hatlary we ýadygärlik sowgatlary gowşurylyp, olar bäsleşigiň jemleýji tapgyryna gatnaşmaga hukuk gazandylar.
Gözel SAPARMÄMMEDOWA,
TMÝG-niň Balkan welaýat Geňeşiniň
Guramaçylyk bölüminiň müdiri.
