Körpe nesliň döredijilik ukyplaryny we zehin başarnyklaryny ýüze çykarmak, olaryň aýdym-saza bolan höweslerini artdyrmak maksady bilen, Sakarçäge etrabynyň 1-nji çagalar bakja-bagynda geçirilen aýdym-sazly çäre täsirli pursatlara beslendi.
Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşiniň ady agzalan çagalar bakja-bagy bilen bilelikde gurnamagynda geçirilen çäre «Aýdymym sazym – Watan» diýlip atlandyrylyp, oňa bu bakja-bagda terbiýelenýän körpeler, terbiýeçilerdir mugallymlar uly höwes bilen gatnaşdylar.
Şatlyk-şowhuna beslenen çärede körpeleriň aýdym-sazly çykyşlaryna giň orun berildi. Çäräniň dowamynda ata Watanymyzyň, bagtyýar çagalygyň, dost-doganlygyň waspyny ýetirýän aýdym-sazlar körpeleriň bu çärä uly taýýarlykly gelendiklerini aýdyň görkezdi. Hususan-da, bagtyýar körpeleriň bagtyýar zamanamyzy wasp edýän goşgulary labyzly ýerine ýetirmekleri olaryň heniz çagalygyna garamazdan, medeniýete, sungata çynlakaý çemeleşýändikleriniň nobatdaky subutnamasy boldy.
Çäräniň ahyrynda oňa gatnaşyjylar körpe nesliň ukyp-başarnyklaryny açyp görkezmäge giň mümkinçilikleri döredip berýän Gahryman Arkadagymyza we Arkadagly Gahryman Serdarymyza alkyş sözlerini beýan etdiler.
Çynar HOŞGELDIÝEWA,
TMÝG-niň Sakarçäge etrap Geňeşiniň
Guramaçylyk bölüminiň esasy hünärmeni.
