Türkmenistanly doganlar Merdan we Şöhrat Toýlyýewler Russiýanyň we Mongoliýanyň çäklerinden geçen «Ýüpek ýoly-2025» halkara awtorallide ýeňiji boldular. Olar bu üstünligi seriýaly ýol dannamazlaryň T2 synpynda gazandylar, bu synpa «Nissan Patrol» awtoulaglarynda diňe üç topar – Türkmenistanyň Awtoulag sport federasiýasynyň ähli wekilleri gatnaşdylar.
15-nji ýubileý rallisi «Ýüpek ýoly-2025» 12-nji iýulda Irkutskden badalga aldy. Onuň ýoly Baýkal kölüniň kenaryndan Mongoliýanyň sähralaryndan we Gobi çölünden geçip, Altaý daglarynyň ýollaryna gaýdyp gelýärdi. Dabaraly tamamlanyş Daglyk Altaýda geçirildi.
Ýaryşa ýük awtoulaglary, motowezdehodlar, motosikller, kwadrosikller we beýleki ulag görnüşleri gatnaşdy. Bäsdeşler 11 günüň dowamynda 4811,6 kilometr ýol geçdiler, şonuň 2402,33 km ýokary tizlikli ýoldy, bu ýerde sürüjiler diňe bir tizlik görkezmän, eýsem, awtoulaglaryň we olary dolandyrmakda säwliklerden hem gaça durmaly boldular.
Türkmen toparlary üçin ralliniň 8-nji we 9-njy tapgyrlary çynlakaý synag boldy. 8-nji tapgyrda olar gumda ýaryşmazlyk kararyna geldiler we bu ýeriň daşyndan aýlanyp geçmek bilen, 29 sagat jerime aldylar. 9-njy tapgyrda bolsa ýaryşda öňde barýan Maksatmyrat Daňatarow 276,66 kilometrlik ýörite bölümden wagtynda geçip bilmedi. Netijede M.Daňatarow öňdeligi Merdan Toýlyýewe giderdi.
Şeýlelik bilen, baýrak gowşurylyş dabarasynda hormat münberiniň iň ýokary gatyna 61 sagat 29 minut 24 sekuntda pellehana ýeten pilot Merdan Toýlyýew we şturman Şöhrat Toýlyýew çykdy. Olar üçin bu ýeňiş 2022-nji ýyldaky ýeňişden soň abraýly ýaryşda eýýäm ikinji ýeňişdi. Ikinji orny eýelän Meýlis Abdyllaýew (pilot) we Italmaz Çaryýew (şturman) dagy ildeşlerinden 6 sagat 58 minut 18 sekunt yza galdylar. Ilkinji üçlügiň ahyrynda duran Maksatmyrat Daňatarow (pilot) we Didar Orazmedow (şturman) ýeňijilerden 106 sagat 49 minut 1 sekunt yzdady.
Diňe bir Russiýa Federasiýasynyň sebitlerini däl, eýsem, Ýewraziýa ýurtlaryny hem birleşdirýän «Ýüpek ýoly» halkara ralli taslamasy 2009-njy ýyldan bäri dowam edip gelýär. Ýaryş dürli ýyllarda Russiýa, Hytaý, Gazagystan, Mongoliýa, Türkmenistan ýaly ýurtlaryň çäginde geçirilipdi.
Ilkinji ralliniň Kazanda başlanandygyny, Gazagystanyň üstünden geçip, Aşgabatda tamamlanandygyny ýatladýarys.
turkmenistan.gov.tm
