Berkarar döwletimiziň bagtyýarlyk döwründe dünýä döwletleri bilen dostlukly gatnaşyklary ösdürýän hormatly Prezidentimiz ýaşlaryň daşary ýurt dillerini kämil bilmekleri üçin ähli mümkinçilikleri döredip, uly işleri durmuşa geçirýär.
Bagtyýar döwletimiziň bagtly nesilleriniň döwrebap bilim-terbiýe alýan ýurdumyzyň orta mekdeplerinde okaýan 8-11-nji synp okuwçylarynyň arasynda iňlis dilini has kämil bilýänleri ýüze çykarmak we olary höweslendirmek maksady bilen, Türkmenistanyň Magtymguly adyndaky Ýaşlar guramasynyň Merkezi Geňeşi hem-de Türkmenistanyň Bilim ministrligi tarapyndan «Berkarar döwletiň zehinli ýaşlary» atly bäsleşik yglan edildi. Aşgabat şäheriniň güni mynasybetli yglan edilen bu bäsleşigiň jemleýji tapgyry paýtagtymyzyň Aýratyn zehinli çagalaryň Saparmyrat Türkmenbaşy adyndaky Döwlet mekdep-internatynda boldy. Oňa bäsleşigiň deslapky tapgyrlarynda ýeňiji bolan okuwçylaryň 13-si gatnaşdy. Olar öz aralarynda düzgünnama laýyklykda üç şert boýunça bäsleşdiler.
Bäsleşigiň birinji şerti boýunça «Meniň Watanym» atly tema boýunça ýurdumyzy wasp edýän aýdym-sazly çykyş eden bolsalar, ikinji şertinde olar «Türkmenistan — rowaçlygyň Watany» ýyly mynasybetli öz taýýarlan wideoşekilini görkezip, ýurdumyzyň gazanan üstünliklerini şahyrana sözler bilen wasp etdiler. Bäsleşigiň üçünji şertinde bolsa okuwçylar bije çekmek arkaly eminler topary tarapyndan taýýarlanan ýumuşlara jogap berdiler. Bu şertleriň ählisini okuwçylaryň iňlis dilinde suwara beýan etmekleri diýseň guwandyryjy boldy.
Eminler toparynyň gelen netijesine görä, «Berkarar döwletiň zehinli ýaşlary» atly bäsleşigiň baş baýragyna Balkan welaýatynyň Türkmenbaşy şäherindäki 11-nji orta mekdebiň 9-njy synp okuwçysy Gurbanbibi Nurjanowa, I orna Daşoguz welaýatynyň Daşoguz şäherindäki daşary ýurt diline ýöriteleşdirilen 24-nji orta mekdebiň 9-njy synp okuwçysy Aýjemal Meredowa, II orna Ahal welaýatynyň Tejen şäherindäki daşary ýurt dillerine ýöriteleşdirilen 11-nji orta mekdebiň 11-nji synp okuwçysy Jemile Batyrowa, III orna Mary welaýatynyň Mary etrabynyň Mülki Baýramow adyndaky 7-nji orta mekdebiniň 11-nji synp okuwçysy Jennet Baýramowa mynasyp boldular.
Bäsleşikde ýeňiji bolan ýaşlara Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň Diplomlary we gymmat bahaly sowgatlary gowşuryldy. Işjeň gatnaşan okuwçylaryň ählisi Hormat hatlary we höweslendiriji sowgatlar bilen sylaglandy.
Gurbannazar ÖWEZOW,
Türkmenistanyň Magtymguly adyndaky Ýaşlar guramasynyň Merkezi Geňeşiniň baş hünärmeni.
“Nesil” gazeti,
23.05.2019ý.
