Şu gün Türkmenistanyň Jemgyýetçilik guramalarynyň Merkezi edara binasynyň kiçi mejlisler jaýynda “Sagdyn durmuş — rowaçlygyň gözbaşy” ady bilen maslahat geçirildi. Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Kärdeşler arkalaşygynyň Milli Merkeziniň bilelikde guramagynda geçirilen maslahat duşuşygynyň esasy maksady sagdyn durmuş kadalaryny berjaý etmek baradaky maksatnamalarymyzy we başlangyçlarymyzy amala aşyrmakdan, ösüp gelýän ýaş nesli sagdyn durmuş ýörelgelerine eýermeklige ugrukdyrmakdan ybarat boldy.
Maslahata ýurdumyzyň dürli edara-kärhanalarynda zähmet çekýän ýaşlaryň we işjeň agzalaryň köpsanlysy gatnaşdy. Ýörite taýýarlanan meýilnama esasynda geçen bu maslahatda çykyşlaryň birnäçesi diňlenip, olarda esasan hormatly Prezidentimiziň parasatly ýolbaşçylygynda ýurdumyzyň saglyk ulgamynda gazanylýan ösüşler, Watanymyzy sagdynlygyň we ruhubelentligiň ýurduna öwürmek baradaky amala aşyrylýan beýik işler, şeýle-de sagdyn durmuş ýörelgelerini jemgyýetimizde pugta ornaşdyrmak, ýaramaz endiklere garşy barlyşyksyz göreş alyp barmak, ösüp gelýän ýaş nesillerimizi türkmeniň milli ruhunda, halkymyza, Watanymyza, hormatly Prezidentimize wepaly adamlar edip terbiýelemekde, neşekeşlige we temmäkä garşy göreşmek barada täsirli gürrüňler edildi. Çykyşlaryň her birinde döwlet Baştutanymyzyň adyna şeýle eşretli, asuda, baky bagtyýar zamany bagyş edendigi üçin alkyş sözleri aýdyldy.
Umyda ŞYHYMGULYÝEWA,
TMÝG-niň Merkezi Geňeşiniň habarçysy.
