Hormatly Prezidentimiziň döredijilige, sungata, medeniýete höwesjeň talyp ýaşlara berýän goldawy, olaryň ýüreklerinde egsilmez ylham, buýsanç, joşgun döredýär. Milli medeniýetiň gülläp ösýän ýurdy hökmünde ykrar edilen mähriban Watanymyzyň her bir güni toý-baýramlara beslenýär. Çünki medeniýet ýurduň ruhy keşbini, gözelligini, özboluşlylygyny özünde jemleýär. Halkymyzyň bagtyýarlyk döwrümize bolan söýgüsiniň waspyny ýetirýär.
Iýun aýynyň 8-ine paýtagtymyzda giň gerim alan «Talyp joşguny — 2019» atly döredijilik festiwaly oňa gatnaşyjylara ýakymly duýgulary peşgeş berdi. «Türkmenistan — rowaçlygyň Watany» ýylynyň joşgunly owazyny wasp etmek, halkymyzyň milli medeniýetiniň many-mazmunyny ýaş nesle öwretmek, türkmen medeniýetini dünýä ýaýmak, talyp ýaşlaryň aýdym-saz we tans sungatynda, halk döredijiliginde zehin başarnyklaryny açmak maksady bilen Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň guramagynda geçirilen festiwala ýurdumyzyň ýokary okuw mekdepleriniň talyp ýaşlary uly höwes bilen gatnaşdylar.
Festiwalyň başynda oňa gatnaşan ýurdumyzyň ýokary okuw mekdepleriniň talyp ýaşlaryna hormatly Prezidentimiziň adyndan sowgatlar hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Bilim ministrliginiň Hormat hatlary gowşuryldy. Soňra talyp ýaşlaryň aýdym-sazly çykyşlaryna giň orun berildi.
«Talyp joşguny — 2019» atly döredijilik festiwalyna gatnaşyjylaryň adyndan hormatly Prezidentimize Ýüzlenme kabul edildi.
Gurbannazar ÖWEZOW,
Türkmenistanyň Magtymguly adyndaky Ýaşlar guramasynyň Merkezi Geňeşiniň baş hünärmeni.
“Nesil” gazeti,
11.06.2019ý.
