Ylymlar güni mynasybetli Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Ylymlar akademiýasynyň bilelikde guramagynda Türkmenistanyň Jemgyýetçilik guramalarynyň merkezi binasynda ýurdumyzyň ylym bilen meşgullanýan ýaşlarynyň arasynda «Ylymly ýaşlar — berkararlygyň binýady» ady bilen ylmy taslamalaryň Sergi bäsleşigi geçirildi. Ylym bilen meşgullanýan ýaşlaryň özbaşdak işlemek endiklerini ösdürmekligi, döredijilik ukyplaryny ýüze çykarmaklygy, ylmy we hünär döredijiligine, ylmy-barlag we önümçilik işine çekmekligi, ýaş alymlaryň iň gowy ylmy we inžener taslamalaryny, talyplaryň we mugallymlaryň okuw we ylmy barlag işlerine degişli hyzmatdaşlyk taslamalaryny giňden ýaýratmaklygy maksat edinen bu bäsleşige ýurdumyzyň ýokary okuw mekdeplerinden, ylym we bilim edaralaryndan 120-den gowrak ýaşlar gatnaşdylar. Bäsleşigiň emin agzalary hödürlenen ylmy taslamalary synçy nazarlary bilen seljerip, olaryň täzeçilligine we derwaýyslygyna görä baha berdiler. Hödürlenen taslamalaryň arasynda ýurdumyzda senagata, ykdysadyýete, oba hojalygyna, lukmançylyga, ylym-bilime degişli oýlap tapyşlar görnükli orun eýeledi.
Bäsleşigiň emin agzalarynyň çözgüdi netijesinde, taslama Sergi bäsleşiginiň baş baýragyna Türkmen döwlet ulag we aragatnaşyk institutynyň kompýuter tehnologiýalary kafedrasynyň mugallymy Mekan Akmämmedow, 1-nji orna Türkmenistanyň Ylymlar akademiýasynyň ylmy işgäri Keýmir Arazmedow, 2-nji orna Türkmenistanyň Döwlet lukmançylyk uniwersitetiniň 4-nji ýyl talyby Atamyrat Berdiýew we Halkara nebit we gaz uniwersitetiniň 4-nji ýyl talyby Ýazmyrat Gulmämmedow, baýrakly 3-nji orna bolsa Magtymguly adyndaky Türkmen döwlet uniwersitetiniň 2-nji ýyl talyby Güýzmämmet Atakaýew, S.A.Nyýazow adyndaky Türkmen oba hojalyk uniwersitetiniň 2-nji ýyl talyby Kadyr Amanow, şeýle-de Türkmen döwlet maliýe institutynyň 2-nji ýyl talyby Allamyrat Işangulyýew dagy mynasyp görüldi.
Olara Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Ylymlar akademiýasynyň adyndan diplomlar we sowgatlar gowşuryldy, işjeň gatnaşan talyp ýaşlara Hormat hatlary berildi.
Merjen GURBANOWA,
Türkmenistanyň Magtymguly adyndaky Ýaşlar guramasynyň Merkezi Geňeşiniň esasy hünärmeni.
“Nesil” gazeti,
11.06.2019ý.
