Şu gün Birleşen Milletler Guramasynyň Neşe we jenaýatçylyk baradaky müdirliginiň (UNODC) Türkmenistandaky wekilhanasynyň, Türkmenistanyň Sport we ýaşlar syýasaty ministrliginiň we Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde guramagynda Aşgabat şäherindäki 17-nji orta mekdebiň sport meýdançasynda kiçi futbol boýunça bäsleşik geçirildi.
Bütindünýä adam söwdasyna garşy göreşmegiň gününe bagyşlanyp geçirilen bu bäsleşige paýtagtymyzyň mekdep okuwçylaryndan düzülen futbolsöýüji toparlar gatnaşdylar. Gyzykly geçen bäsleşikde ýeňiji bolan toparlara ony guraýjylar tarapyndan ýadygärlik sowgatlary gowşuryldy.
Bütindünýä adam söwdasyna garşy göreşmegiň gününe bagyşlanan çäreleriň biri-de “Berkarar” söwda we dynç alyş merkezinde geçirildi. Aýdym-sazly dabara, täsirli çykyşlara baý bolan bu çäräni Birleşen Milletler Guramasynyň Neşe we jenaýatçylyk baradaky müdirliginiň (UNODC) Türkmenistandaky wekilhanasy, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Senagatçylar we telekeçiler birleşmesi we jemgyýetçilik guramalary bilelikde guradylar.
Umyda KAKAÝEWA,
TMÝG-niň Merkezi Geňeşiniň habarçysy.
