Halkara ynsanperwer ylymlary we ösüş uniwersitetinde Türkmenistanyň Bilim, Saglygy goraýyş we derman senagaty ministrlikleriniň ýolbaşçylarynyň, Mejlisiň deputatlarynyň, jemgyýetçilik guramalarynyň wekilleriniň, ýokary okuw mekdepleriniň professor-mugallymlarynyň we talyplaryň gatnaşmagynda maslahat geçirildi. «Bitarap Türkmenistan we halkara guramalary: ösüş arkaly parahatçylyk ýolunda» ady bilen geçirilen ylmy-amaly maslahat ýurdumyzyň hemişelik Bitaraplygynyň 25 ýyllygyna bagyşlandy.
Onda hormatly Prezidentimiziň gatnaşmagynda paýtagtymyzda geçirilen «Türkmenistan we halkara guramalary: parahatçylygyň we ösüşiň hatyrasyna hyzmatdaşlyk» atly halkara maslahatynyň barşynda gol çekilen 12 sany resminamanyň ähmiýeti, şol sanda ýaş nesilleriň saglygy, döwrebap bilim almagy, beden hem-de ruhy taýdan ösüşi, durmuş taýdan goraglylygy boýunça öňde goýlan wezipeleri durmuşa geçirmegiň ýollary barada gürrüň edildi.
Maslahatda çykyş edenleriň belleýşi ýaly, halkara derejede ykrar edilen syýasy hukuk derejesine eýe bolan Garaşsyz ata Watanymyz Merkezi Aziýa sebitinde ylalaşdyryjy merkeze öwrüldi. Bu gün Türkmenistan hormatly Prezidentimiziň dostluk, hoşniýetli goňşuçylyk ýörelgelerine esaslanýan, dünýäniň döwletleri hem-de halklary bilen ysnyşykly gatnaşyklary pugtalandyrmaga gönükdirilen içeri we daşary syýasatyny üstünlikli durmuşa geçirýär. Ýurdumyz parahatçylygy we durnuklylygy pugtalandyrmak, döwletara gatnaşyklaryň usullaryny giňeltmek işinde BMG-niň tagallalaryny doly goldaýar.
Dabaraly maslahatda hemişelik Bitaraplyk ýörelgelerine ygrarly bolan mähriban Watanymyzyň dünýä giňişliginde abraý-mertebesiniň mundan beýläk-de ýokarlanmagy ugrunda hormatly Prezidentimiziň alyp barýan döwletli tutumlarynyň elmydama rowaçlyklara beslenmegi arzuw edildi.
Gurbanmyrat MUHAMMEDOW,
Türkmenistanyň Magtymguly adyndaky Ýaşlar guramasynyň Merkezi Geňeşiniň bölüm müdiri.
“Nesil” gazeti,
23.01.2020ý.
