Sporty ýaş nesilleriň arasynda wagyz etmek, ýaşlary sporta höweslendirmek maksady bilen, Dänew etrabyndaky 3-nji sport mekdebinde sportuň küşt, şaşka, düzzüm görnüşleri boýunça «Sport — saglygyň girewi» ady bilen ýaryş geçirildi. Etrap Ýaşlar guramasy bilen etrap sport we ýaşlar syýasaty bölüminiň bilelikde guramagynda geçirilen ýaryşa etrabyň orta mekdeplerinden okuwçylar gatnaşdylar. Gyzgalaňly geçen bäsleşikde tapawutlanan okuwçylara Hormat hatlary we ýadygärlik sowgatlary dabaraly ýagdaýda gowşuryldy.
Gülbahar BEŞIMOWA,
TMÝG-niň Dänew etrap Geňeşiniň esasy hünärmeni.
Berkarar döwletimiziň bagtyýarlyk döwründe hormatly Prezidentimiziň parasatly baştutanlygynda ýurdumyzda dürli ugurlar bilen bir hatarda, sport ulgamyna hem aýratyn üns berilýär. Şundan ugur alyp, Ýolöten etrap Ýaşlar guramasynyň etrap sport we ýaşlar syýasaty bölümi bilen bilelikde guramagynda sportuň dzýudo göreşi görnüşi boýunça etrabyň birinjiligini almak ugrunda toparlaýyn ýaryş geçirildi. Etrabyň sport mekdebinde geçirilen bu ýaryşa mekdepde tälim alýan türgen gyzlar gatnaşdylar. Çekeleşikli geçen ýaryşyň netijeleri boýunça ýeňiji toparlar yglan edildi hem-de Hormat hatlary we ýadygärlik sowgatlary bilen sylaglanyldy.
Serdar MUHYÝEW,
TMÝG-niň Ýolöten etrap Geňeşiniň başlygy.
Köpetdag etrap Ýaşlar guramasynyň Aşgabat şäher Baş bilim müdirligi bilen bilelikde guramagynda etrabyň orta mekdepleriniň 9-11-nji synplarynda okaýan gyzlaryň gatnaşmagynda Türkmen halysynyň milli muzeýine gezelenç guraldy. Muzeý işgärleri esasy gymmatlyklar bolan türkmen halylarynyň dürli görnüşleri, olaryň nagyşlarynyň aňladýan manylary, aýratynlyklary dogrusynda täsirli gürrüň berdiler. Çünki jemgyýetimiziň esasy sütüni bolan gelin-gyzlarymyz asyrlaryň dowamynda milli däp-dessurlarymyzy berjaý edişleri, asyllylygy, çeper elliligi bilen tapawutlanypdyrlar. Umuman, bu gezelenç täsirliligi bilen ýatda galyjy boldy.
Oguljahan TÖRÄÝEWA,
TMÝG-niň Köpetdag etrap Geňeşiniň esasy hünärmeni.
Gelin-gyzlarymyza bagtyýarlyk döwrümizde hem milli mirasymyzy dowam etdirijiler hökmünde aýratyn orun degişlidir. Hut şundan ugur alyp, Serdar etrap Ýaşlar guramasy etrabyň we Serdar şäheriniň beýleki jemgyýetçilik guramalary bilen bilelikde «Gyzly öý — gyzylly öý» ady bilen wagyz-nesihat duşuşygyny geçirdi. Şäher häkimliginiň mejlisler zalynda geçirilen duşuşyga etrabyň we şäheriň dürli edara-kärhanalarynda zähmet çekýän öňdebaryjy ýaş gelin-gyzlar, mekdep okuwçylary gatnaşdylar. Dabarada çykyş edenleriň belleýşi ýaly, milli däp-dessurlarymyzy döwrebap röwüşde dowam etdirmek, ýaş nesilleriň arasynda ýaýmak mukaddes borçdur.
Aýbibi TÄÇMYRADOWA,
TMÝG-niň Serdar etrap Geňeşiniň işgäri.
Tejen şäherindäki 8-nji çagalar bagynda «Hormatly Prezidentimiziň adyl syýasaty ýaşlaryň durmuş ýörelgesidir» ady bilen wagyz-nesihat duşuşygy geçirildi. Şäher Ýaşlar guramasynyň we şäheriň beýleki jemgyýetçilik guramalarynyň bilelikde guramagynda geçirilen duşuşyga bilim we medeniýet ulgamlarynda zähmet çekýän öňdebaryjy ýaş hünärmenler gatnaşdylar. Çykyş edenler milli Liderimiziň ýaş nesillerimiz hakdaky atalyk aladalary, ösüp gelýän ýaş nesilleriň arasynda sagdyn durmuş ýörelgelerini wagyz etmegiň ähmiýeti dogrusynda giňişleýin gürrüň etdiler.
Kakamyrat NURBERDIÝEW,
TMÝG-niň Tejen şäher Geňeşiniň esasy hünärmeni.
Boldumsaz etrap Ýaşlar guramasynyň etrap bilim bölümi bilen bilelikde guramagynda etrabyň orta mekdepleriniň 9-11-nji synplarynda okaýan okuwçylaryň arasynda «Meniň okan kitaplarym, indi okamaly kitaplarym» ady bilen bäsleşik geçirildi. Etrabyň merkezi kitaphanasynda geçirilen bu bäsleşikde okuwçylar 3 şert boýunça bäsleşip, okan kitaplarynyň mazmunyny gürrüň berdiler, eserlerdäki baş gahrymanlaryň häsiýetlerini seljerdiler we emin agzalary tarapyndan berlen sowallara jogap berdiler. Gyzykly geçen bäsleşikde ýeňiji bolan okuwçylar dabaraly ýagdaýda Hormat hatlary we ýadygärlik sowgatlary bilen sylaglanyldy.
Patma AŞYROWA,
TMÝG-niň Boldumsaz etrap Geňeşiniň esasy hünärmeni.
“Nesil” gazeti,
12.03.2020ý.
