Türkmenistanyň Nebitgaz toplumynyň Medeni-işewürlik merkezinde «Iň eýjejik gyzjagaz — 2020» atly şadyýan bäsleşigiň «Türkmenistan — Bitaraplygyň mekany» ýylymyzdaky döwlet tapgyrynyň jemi jemlenildi. Türkmenistanyň Magtymguly adyndaky Ýaşlar guramasynyň Merkezi Geňeşiniň Türkmenistanyň Bilim ministrligi bilen bilelikde ýurdumyzyň umumybilim berýän mekdepleriniň 2 — 4-nji synplarynda okaýan okuwçy gyzlaryň arasynda geçirilýän bu bäsleşige welaýat we Aşgabat şäher tapgyrlarynyň ýeňiji körpeleri gatnaşdylar.
Bäsleşigiň şertlerine laýyklykda zehinli gyzjagazlar hormatly Prezidentimiziň baştutanlygynda Berkarar döwletimiziň bagtyýarlyk döwründe alnyp barylýan tutumly işleri, eziz Watanymyzy, bagtyýar çagalygy, dost-doganlygy, sporty wasp edýän aýdym-sazly çykyşlary ýerine ýetirdiler. Milli egin-eşiklerimizi şahyrana sözler bilen taryp etdiler. Şeýle hem olar emin agzalary tarapyndan ýaş aýratynlyklaryna görä taýýarlanan goşgulary çeper okamakda bäsleşdiler.
Netijede, Baş baýraga Ahal welaýatynyň Ak bugdaý etrabyndaky 16-njy orta mekdebiň 2-nji synp okuwçysy Aýgül Allanazarowa, 1-nji orna Lebap welaýatynyň Saýat etrabyndaky ýöriteleşdirilen 1-nji orta mekdebiň 4-nji synp okuwçysy Selbi Babalyýewa, 2-nji orna Mary welaýatynyň Mary şäherindäki 24-nji zehinli ýaşlar mekdebiniň 3-nji synp okuwçysy Näzli Germanowa, 3-nji orna bolsa Mary welaýatynyň Tagtabazar etrabyndaky 20-nji orta mekdebiň 4-nji synp okuwçysy Oguljennet Agaýusupowa dagy mynasyp boldular.
Bäsleşigiň ýeňijilerine dabaraly ýagdaýda Diplomlar we sowgatlar gowşuryldy.
Gurbannazar ÖWEZOW,
TMÝG-niň Merkezi Geňeşiniň baş hünärmeni.
“Nesil” gazeti,
26.03.2020ý.
