Şu gün Türkmenistanyň Jemgyýetçilik guramalarynyň Merkezi binasynda Türkmenistanyň Mejlisiniň, Bilim ministrliginiň, Medeniýet ministrliginiň, Magtymguly adyndaky Ýaşlar guramasynyň Merkezi Geňeşiniň, Demokratik partiýasynyň Syýasy Geňeşiniň, şeýle hem Zenanlar guramasynyň Merkezi Geňeşiniň bilelikde guramagyndan aýdym-sazly dabaraly maslahat geçirildi.
Ýurdumyzyň dürli edara-kärhanalarynda, harby we hukuk goraýjy edaralarynda zähmet çekýän, orta, ýörite orta we ýokary okuw mekdeplerinde bilim alýan ýaşlaryň gatnaşmaklarynda geçen bu dabaraly maslahat «Ussat mugallym, edermen esger, ilhalar ynsan Berdimuhamet Annaýewiň nusgalyk ýoly – ýaşlary millilik, watançylyk ruhunda terbiýelemekde görelde mekdebi» atly şygar astynda geçirildi.
Maslahatyň barşynda Jemgyýetçilik guramalarynyň giň foýesinde guralan sergi oňa gatnaşyjylary biparh goýmady. Sergi powilonlarynda Milli Liderimiziň jöwher paýhasyndan syzylyp çykan eserler, Berdimuhamet Annaýewiň ömür ýoluny açyp görkezýän täsirli gollanmalar, gulluk resminamalary, şeýle-de türkmeniň milliligini açyp görkezýän köpsanly çeşmeler mynasyp orun aldy.
Soňra maslahat öz işine başlady. Aýdym-sazly dabaraly maslahatda çykyşlaryň birnäçesi diňlenilip, olarda milli Liderimiziň parasatly ýolbaşçylygynda ýurdumyzda gazanylýan üstünlikler, ýetilýän beýik sepgitler, döwlet syýasatynyň aýratyn üns berilýän ugurlarynyň biri hökmünde ýaş nesil hakyndaky aladalar, döwletimiziň we jemgyýetimiziň ykdysady, syýasy we medeni durmuşyna ýaşlaryň doly hukukly gatnaşmaklaryny gazanmak ugrundaky wezipeler, şeýle hem milli ruhly watançy nesli kemala getirmek boýunça alnyp barylýan işler dogrusynda täsirli gürrüňleri etdiler. Olarda bellenilişi ýaly, Milli Gahrymanlaryny hatyralamak türkmen halkynyň gadymdan gelýän asylly däpleriniň biri bolup durýar. Mähriban halkymyzyň parahatçylygynyň, bagtyýarlygynyň we abadançylygynyň hatyrasyna baş goýan gaýduwsyz pederlerimiz ýaş nesilleriň watansöýüjilik we Watana wepalylyk ruhunda terbiýelenmegine aýratyn täsir edýär. Olaryň arasynda hormatly Prezidentimiziň atasy Berdimuhamet Annaýewiň aýratyn orny bolup, onuň durmuş ýoly täze taryhy eýýamda ösüp barýan ýaş nesiller üçin watansöýüjiligiň, borja wepalylygyň nusgalyk mekdebine öwrüldi.
Şeýle hem maslahatda çykyş edenler ýakynda – 9-njy maýda Beýik Ýeňşiň 75 ýyllygy mynasybetli guralan dabarada edermen we gaýduwsyz esger Berdimuhamet Annaýewiň söweşen 206-njy atyjylyk diwiziýasynyň 748-nji atyjylyk polkunyň söweşjeň baýdagynyň getirilendigi we onuň Watanymyzyň öňünde bitiren hyzmatlary, merdana watandaşlarymyzyň aldym-berdimli söweşlerdäki gahrymançylygynyň hem-de gaýduwsyzlygynyň häzirki we geljekki nesilleriň ýüreklerinde baky ýaşajakdygyny uly buýsanç bilen bellediler.
Dabaranyň dowamynda ýurdumyzyň tanymal bagşy-sazandalarynyň, medeniýet-sungat işgärleriniň ýerine ýetirmeginde ýaňlanan şirin aýdym-sazlar, okalan manaloglar maslahata gatnaşyjylarda ýakymly täsirleri galdyrdy.
Umyda KAKAÝEWA,
TMÝG-niň Merkezi Geňeşiniň bölüm müdiri.
