Şu gün Türkmenistanyň Mejlisiniň, Jemgyýetçilik guramalarynyň, Bilim ministrliginiň, Saglygy goraýyş we derman senagaty ministrliginiň, Sport we ýaşlar syýasaty ministrliginiň we Ylymlar akademiýasynyň bilelikde guramaklarynda Türkmenistanyň Jemgyýetçilik guramalarynyň merkezi binasynda maslahat geçirildi. “Türkmenistanyň saglygy goraýyş ulgamyndaky halkara başlangyçlarynyň ykrar edilmesi” atly şygar astynda geçen bu maslahata paýtagtymyzyň dürli edara-kärhanalarynda zähmet çekýän ildeşlerimiziň köpsanlysy gatnaşdylar.
Maslahatda çykyşlara giň orun berlip, onda çykyp geplänler Berkarar döwletimiziň bagtyýarlyk döwründe halkymyzyň saglygyny goramak, abadan we bagtyýar durmuşda ýaşamagyny üpjün etmek hormatly Prezidentimiziň parasatly ýolbaşçylygynda alnyp barylýan döwlet syýasatynyň ileri tutulýan ugurlarynyň birine öwrülendigi, milli Liderimiziň başlangyçlary bilen bu babatda kabul edilen milli maksatnamalaryň we strategiýalaryň Birleşen Milletler Guramasy we beýleki abraýly halkara guramalary tarapyndan uly goldawa eýe bolýandygy, muny ýakynda BMG-niň Baş Assambleýasynyň 74-nji sessiýasynyň barşynda bu mejlisiň resminamasy hökmünde hormatly Prezidentimiziň Bütindünýä saglygy goraýyş guramasynyň Baş direktory Tedros Gebreýesusyň adyna iberen hatynda beýan edilen COVID-19 koronawirus keseliniň pandemiýasyna garşy göreşmek boýunça ilatyň saglygyny goraýyş ulgamynda Türkmenistanyň hökümeti tarapyndan amala aşyrylýan çäreler baradaky maglumatyň ýaýradylmagynyň, bu resminamanyň Birleşen Milletler Guramasynyň resmi dillerinde neşir edilmeginiň hem-de BMG-niň agza döwletleriniň arasynda ýaýradylmagynyň hem aýdyň subutnamadygy dogrusynda täsirli gürrüňleri etdiler.
Çykyşlaryň her birinde il saglygyny ýurt baýlygyna deňeýän hormatly Prezidentimiziň alyp barýan döwlet syýasatynda mundan beýläk hem rowaçlyklaryň ýar bolmagyny, mähriban Watanymyzyň halkara abraýynyň hemişe belentde bolmagyny tüýs ýürekden arzuw etdiler.
Begmuhammet MEREDOW,
TMÝG-niň Merkezi Geňeşiniň bölüm müdiri.
