Aşgabat şäheriniň Berkararlyk etrap häkimliginiň mejlisler zalynda etrabyň edara-kärhanalarynda zähmet çekýän işgärleriň arasynda «Arkadagly ýurdum hemişelik Bitarap» ady bilen maslahat duşuşygy geçirildi. Çykyş edenler hormatly Prezidentimiziň alyp barýan içeri we daşary syýasaty, ýurdumyzda durmuşa geçirilýän beýik özgertmeler dogrusynda buýsanç bilen bellediler. Duşuşygyň ahyrynda oňa gatnaşanlar Gahryman Arkadagymyzyň asylly işleriniň hemişe rowaç bolmagyny arzuw etdiler.
Merdanali ORAZBERDIÝEW,
TMÝG-niň Berkararlyk etrap Geňeşiniň başlygy.
TMÝG-niň Bereket etrap Geňeşiniň guramagynda etrabyň edara-kärhanalarynda zähmet çekýän ýaşlaryň arasynda «Ýaşlar, siz geljegimiziň nesilleri» ady bilen maslahat duşuşygy geçirildi. Duşuşygyň dowamynda Türkmenistanyň Halk Maslahatynyň nobatdaky mejlisinde kabul edilen resminamalaryň ähmiýeti, bu syýasy-jemgyýetçilik çäräniň ýurdumyzyň durnukly ösüşini, halkymyzyň abadan durmuşyny üpjün etmekdäki orny dogrusynda giňişleýin gürrüňler edildi.
Baýramgül SARAÝEWA,
TMÝG-niň Bereket etrap Geňeşiniň hünärmeni.
Ýaşulularyň halkara güni mynasybetli S.A.Nyýazow adyndaky etrabyň Medeniýet öýünde aýdym-sazly dabara geçirildi. Oňa ak sakgally ýaşulular hem-de kümüş saçly eneler bilen bir hatarda, etrabyň we Daşoguz welaýatynyň jemgyýetçilik guramalarynyň wekilleri gatnaşdylar. Dabarada etrabyň çeper höwesjeňler toparynyň taýýarlan çykyşlaryna orun berildi.
Sabyrgeldi BEGOW,
TMÝG-niň S.A.Nyýazow adyndaky etrap Geňeşiniň hünärmeni.
TMÝG-niň Bäherden etrap Geňeşiniň etrap polisiýa bölümi bilen bilelikde guramagynda etrabyň 10-njy hem-de 29-njy orta mekdeplerinde «Ýaş neslimiziň saglygy — ýurdumyzyň geljegi» ady bilen wagyz-nesihat duşuşygy geçirildi. Duşuşykda ýaşlaryň ahlak terbiýesi, ýaramaz endiklerden daşda durmak, sagdyn durmuş ýörelgesine eýermek, arassaçylyk düzgünlerini berk berjaý etmek dogrusynda giňişleýin düşündiriş işleri geçirildi.
Arzygül AGAÝEWA,
TMÝG-niň Bäherden etrap Geňeşiniň hünärmeni.
Garagum etrabynyň «Baýramaly» daýhan birleşiginiň meýdan düşelgesinde etrap häkimliginiň, medeniýet bölüminiň hem-de jemgyýetçilik guramalarynyň guramagynda aýdym-sazly medeni-köpçülik dabarasy geçirildi. Bagşy-sazandalaryň ýerine ýetiren aýdymdyr sazlarynyň şirin owazy «ak altynly» pellere ýaň saldy. Dabaranyň dowamynda pagta ýygymynda tapawutlanan ýygymçylara we mehanizatorlara etrabyň jemgyýetçilik guramalary tarapyndan ýadygärlik sowgatlary gowşuryldy.
Ogulbagt AMANMYRADOWA,
TMÝG-niň Garagum etrap Geňeşiniň hünärmeni.
TMÝG-niň Dänew etrap Geňeşiniň hem-de etrap bilim bölüminiň guramagynda etrabyň 6-njy orta mekdebinde hormatly Prezidentimiziň jöwher paýhasyndan dörän «Türkmeniň döwletlilik ýörelgesi» atly kitabynyň tanyşdyrylyş dabarasy geçirildi. Dabarada çykyş edenler eserdäki çuňňur pelsepewi pikirleriň, many-mazmuna baý tymsallaryň ähmiýetini nygtadylar we şeýle ajaýyp kitaby sowgat beren hormatly Prezidentimize alkyş sözlerini aýtdylar.
Dursunjemal SARYÝEWA,
TMÝG-niň Dänew etrap Geňeşiniň hünärmeni.
“Nesil” gazeti,
10.10.2020ý.
