Bir lukman ýaş wagty onuň halypasy:
—Eý, şägirt, goýny soý we onuň etiniň iň gowy ýerinden iki bölek getir! — diýýär.
Ýaş lukman goýny soýýar we onuň ýüregini hem-de dilini getirýär. Soňra ýene-de bir gün halypasy:
—Eý, şägirt, git-de goýny soý we maňa onuň etiniň iň erbet ýerinden iki bölek getir! — diýýär.
Ýaş lukman gidip, goýny soýýar we bu gezek hem goýnuň ýüregini hem-de dilini getirip berýär.
Halypa:
—Eý, şägirt, men saňa: “Goýnuň etiniň gowy ýerinden getir” diýenimde-de, “Erbet ýerinden getir” diýenimde-de, onuň ýüregi bilen dilini getirdiň. Näme üçin beýle edeniňi düşündir! — diýende, ýaş lukman:
—Eger bedende şu iki zat gowy bolsa, ol adam gowudyr. Şu iki zat erbet bolsa, ol adam erbetdir — diýýär.
Ýaş lukmanyň aýdanlary onuň halypasynyň göwnünden turýar.
Dil – ýüregiň açary.
* * *
Şadyýan ýürek – ýüzi güldürer,
Gamgyn ýürek – meňzi soldurar.
* * *
Ýagşynyň kalby – kuýaş, ýamanyň bagry – daş.
* * *
Dil bar – bal getirer, dil bar – bela getirer.
* * *
Batyry batyr eden gylyç bilen bilegi,
Ýamany ýaman eden gara ýürek dilegi.
* * *
Dil bar – düzer, dil bar – bozar.
* * *
Şir hümmeti bilekde, är hümmeti ýürekde.
* * *
Dil – maýa, dil – zaýa.
* * *
Ýürekden ýürege ýol bar.
* * *
Dili kelte – salamat, dili uzyn – melamat.
* * *
Dili süýjiniň dosty köp.
Ýürekden çykan söz ýürege ýeter.
