Ähli ýaramaz işleriň we ýaramaz endikleriň gözbaşy nadanlykdyr.
***
Bir şahyr şeýle diýýär:
Nadan bolsa ene-atanyň biri,
Hökman ýeter balasyna täsiri.
***
Alymyň nadanlykdan üstün çykmagyndan ylmyň nadandan üstün çykmagy has gowudyr.
***
Akyl eýeleri öz aralarynda tiz düşünişerler. Emma samsyk adam bilen ne akylly, ne-de samsyk düşünişip biler. Muňa mysal, göni agajy göni agajyň ýanynda goýsaň, ikisi deň gelip, dogry durarlar. Emma egri agaç bolsa ne göni agaç bilen, ne-de egri agaç bilen dogry durar.
***
Bir çarwa ogluna: «Ýagyr eşek bolgun, wagşy möjek bolgun, öý goraýan it bolgun, emma nadan adam bolmagyn» diýýär.
***
Bir çarwa: «Eger-de biziň aramyzda ýalan, ýalňyş sözleýänler bolmasa, dogry sözliniň gadyry bilinmezdi» diýýär.
***
Nadan adama edep-ekram öwretmek, oňa tälim bermek, hasyl bermejek daşly ýere tohum taşlan ýalydyr.
***
Bir dana: «Nadan adam arzuw edende-de biderek zatlar hakynda arzuw eder» diýýär.
***
Samsyk, nadan adama subutnamanyň derkarlygy ýokdur. Subutnamalar onuň üçin gury sözdür.
***
Bir dana: «Gürläniňde goýberilen ýalňyşlygy şolbada düzedip bolar. Emma durmuşda goýberilen säwligi düzetmek kyndyr» diýýär.
***
Alym, şahyr, serkerde we belli emirleriň biri Abu Eswet Duweli: «Akylly, alym adama ezýet berjek bolsaň, ony samsyk, nadan adam bilen söhbetdeş edäýmeli» diýýär.
***
Günä işler uly bir gala bolsa, ýalňyşlyk bu galanyň açarydyr.
***
Bir akyldar: «Samsyk, nadan adam gymmat bahaly zadyň gymmatyna, onuň nepisligine düşünmez. Manyly çeper gürrüňlere diňe pähimli, düşbi adam akyl ýetirip biler» diýýär.
***
Nadan adam bolmadyk wakalary özünden toslap, başgalara gürrüň berýär. Soňra şol gürrüňlere özi hem ynanýar.
***
Bilenini ile öwretmedik nadandyr.
